Kenyan runner daog na sab sa Red Cross Humanity Run

CEBU, Philippines - Laing lumba na sab ang gidominaran sa Kenyan Missionary nga si Simon Losaiboi, ning higayuna ang labing unang Red Cross Humanity Run kagahapon diha sa PNRC Bldg. sa Osmeña Blvd., ning siyudad.

Si Losaiboi kinsa misakmit sa korona sa miaging mga lumba sama sa Rock and Run 2, Running M.A.D ug 1st Eco-Fun Run, nanghawud pag-usab sa 10K Men’s open kagahapon human niya gitapos ang lumba sa oras nga 29:35.82. 

Nagsunod ni Losaiboi alang sa ikaduhang luna mao si John Phillip Dueñas, samtang si Robert Daang mipahiluna sa ikatulong dapit.

Sa 10K women’s division, ang Cebuana nga si Madelyn Carter mao ang mikampiyon sa oras nga 35:39.44, samtang ang suod nga higala ni Carter nga si Liezl Lumindas-Getaruelas ug si Gerlie Baylon mao ang second ug third placer.

Ang garbo sa University of Southern Philippines Foundation (USPF) nga si Joel Delposo mirehistro usab og oras nga 14:36.64 aron makuha ang titulo sa 5K Men’s open ug si Mary Tabal sa iyang oras nga 17:58.70 mao usab ang migawas nga reyna sa 5K Women’s open. - Lemuel P. Maglinte (BANAT NEWS)