Mavs, Bucks naka-ipsot

CEBU, Philippines - Ang 17-foot jumper ni Jason Terry sa katapusang 1.4 segundo maoy mipadaog sa Dallas Mavericks batok sa Philadelphia Sixers, 104-102 aron paghipos sa ilang ika-13 ka daog sa National Basketball Association kagahapon didto sa American Airlines Center sa Dallas, Texas.

Ang iskor gitabla ni Andre Iguodala sa Sixers sa 102-all sa nahabiling 5.6 human napasulod ni Terry ang iyang tirada.

Si Dirk Nowitzki maoy nangu sa Mavs sa iyang 28 puntos, samtang si Jason Kidd mirehistro og season-high 22 puntos uban sa iyang 11 ka assists ug unom ka rebounds.

Si Terry igo lang mi-iskor og siyete puntos lakip ang winning basket.

Si Willie Green mi-iskor og 23 puntos alang sa Sixers, samtang sila si Thaddeus Young ug Elton Brand parehong mibugha og 21 puntos.

Didto sa Bradley Center, ang host Milwaukee Bucks nakaipsot bitbit ang 99-97 nga kadaugan batok sa nanulong nga Chicago Bulls.

Si Andre Bogut maoy nangu sa Bucks nga mipabuto og 22 puntos uban ang 15 ka rebounds, samtang sila si Josh Salmons ug Luol Deng mao sab ang nangu sa Bulls sa ilang 23 ug 22 puntos.

Sa laing duwa, ang Utah Jazz milubong sa Memphis Grizzlies sa iskor nga 120-93, ang Golden State Warriors milubong sab sa Indiana Pacers, 126-107.

Sa laing bahin, ang general manager sa New Jersey Nets nga si Kiki Vandeweghe pormal nga gitudlo isip bag-ong coach sa maong koponan. Siya maoy mohulip sa dapit ni Tom Barrise, kinsa maoy mipuli sa gipalagpot nga coach Lawrence Frank.

Si Vandeweghe nakigkita kagahapon sa presidente sa Nets nga si Rod Thorn human mosugot si Del Harris nga magsilbi niyang assistant.

Sa laing kalamboan, may kahigayonan nga makabalik og duwa sa Philadelphia ang mi-retirong si Allen Iverson, kinsa sinaligan kaniadto sa maong team, apan wala pa makompirmar ang iyang pagbalik. - Gabby G. Malagar gikan sa NBA.com (BANAT NEWS)