AJY, 3M-RJ, Boyla milansang daog sa LLBA Christmas League 2009

CEBU, Philippines - Gipuhag sa AJY squad ang sikit nilang duwa batok sa COMFA, 78-75 aron pagposte sa ilang ikalimang sunod-sunod nga daog sa nagpadayong Lapu-Lapu Basketball Association (LLBA) Christmas League 2009 didto sa Villas Magalanes Gym sa Sta. Lucia Property sa Barangay Basak, dakbayan sa Lapu-Lapu.

Ang AJY mirehistro og double-digit nga labaw paghuman sa first period, 24-12, apan nalimitahan kini sa sunod kuwarter diin igo lang kini naka-iskor og nuybe puntos nga naghatag og higayon sa COMFA paglaslas sa alkanse sa halftime, 33-25.

Sa mga paningkamot nilang Amay Palad, Buldog Ybañez ug Ernie Giganto sa COMFA, nalumpag ang higanteng labaw sa AJY ug nailog pa nila ang dos puntos nga abante, 59-57 paingon sa final period.

Nagtinubagay og mga puntos ang duha ka kampo, apan ang AJY sa paggiya ni LLBA commissioner Allan Yu, uban sa suporta nilang Celso Igot, Tata Bardago ug Joel Ochea, mipahungaw sa ilang kainit hangtod nga naangkon nila sa hingpit ang kadaugan.

Si Igot maoy topscorer sa ANY pinaagi sa iyang 21 puntos, gisundan ni Bardago nga adunay 13 puntos, si Ochea miamot og 12 puntos, samtang si Yu adunay 10 puntos.

Ang naparot nga COMFA gipangulohan ni Palad kinsa miposa og 16 puntos ug si Ybañez miabuno og 13 puntos.

Sa laing duwa, ang 3M-RJ mipukan sa Yan C Rico alang sa ilang unang daog sa iskor nga 75-61.

Si Pompy Ngujo maoy nangulo sa 3M-RJ nga mibugha og 28 puntos, gisundan ni Ram Gomez nga mitimang og 24 puntos.

Ang pilderong Yan C Rico gipangulohan sab ni Lito Magat pinaagi sa iyang 14 puntos, samtang sila si Alvin Bentasal ug Eddie Boy Alian mitampo og 10 puntos matag usa.

Miposte sab sa labing una nilang daog ang Boyla pinaagi sa pagpukan sa i3R, 72-64.

Sila si Villamor ug Ibasco nagkumboya og 34 puntos aron pangulohan ang Boyla nga nagbitbit og 1-2 nga baraha.

Si Dandan Ramos mao sab ang nangulo sa pilderong i3R, kinsa wala pa makatilaw og daog sud sa upat ka duwa.

Unang duwa:

3M-RJ (75) - Ngujo 28, Gomez 24, Sayson 9, Sorono 4, Fuentes 3, Dacogo 3, Lorena 2, Aying 2

YAN C RICO (61) - Magat 14, Bentasal 10, Alian 10, Abing 8, Simbajon 6, Adlit 4, Escuyos 3

Ikaduhang duwa:

BOYLA (72) - Villamor 22, Ibasco 12, Medina 7, Assuncion 6, Tampus 5, Darus 3, Hiyas 3, Tempurada 2

I3R (64) - Ramos 18, Bancale 13, Luayon 9, Oyao 9, Igot 6, Espinosa 6, Bensi 6

Ikatulong duwa:

AJY (78) - Igot 12, Bardago 13, Ochea 12, Yu 10, Dano 7, Labadan 5, Tampus 4, Acuna 2, Cosep 2

COMFA (75) - Palad 16, Ybañez 13, Giganto 8, Odiada 6, Lamoste 6, Dignos 6, Barong 5, Intong 5. -PR/Billy Nadado (BANAT NEWS)