Saga mipaundang ni Bacalso

CEBU, Philippines - Gipaundang ni Christian Saga sa Rex Wakee Salud (RWS) stable ang kontra niining   si Nickjoy Bacalso sa Cebu City Sports Center (CCSC) Stable pinaagi sa iyang makabungog nga 1-2 combinations   sa “Paboksing sa Barangay” niadtong miaging gabii diha sa Barangay Pahina Central Sports Complex, ning siyudad.

Si Bacalso unang mibuhi og mahait nga sukmag diin iyang napatumba si Saga sa unang hugna. Apan si Saga nakabangon ug mipakita sa iyang kaisog aron dabodabohan si Bacalso nga maoy nakapaaghat sa referee paghunong sa away sa 1:24 sa second round.

Laing CCSC boxers nga nadisgrasya mao si Junille Olivares, kinsa gi-TKO ni Simplicio Mision sa Seville Stable sa Talisay City, napilde usab si Junrey Sta. Ana batok ni Lyndell Raduc sa Sta. Cruz Stable ug si Ian Refuella   batok ni Jalil Payao sa Omega Stable sa Mandaue City.

Hinuon, ang igsuon ni Refuella nga si Allan dihang mikulit og daog pinaagi sa puntos batok ni Jonas Sultan sa Omega Stable ubos sa 52 kgs category. Si Junriel Jimenez mipukan ni Lester Dula ug si Zandro Sabanal mipaluhod ni Lester Tejada sa RWS Stable.

Si Ardie Boyose mao sab ang mipatigbabaw batok ni Steven Noblefrances sa 45 kgs. division, si Tonton Sultan mimakmak ni Lamberto Catubayug ug si Michael Estorco mipatumba ni Jomark Cabillon sa round four sa 57 kgs. division.

Mikulit usab og daog si Ramjess Colina human niya kulataha si Juvanni Ruelan, samtang si Raymund Empec midaog batok ni Joseph Demos. – BANAT NEWS