CEBU, Philippines - Nidaog na gyud ang Laguna Trace-Stallions human nila gipukan ang Quezon City Red Oilers, 72-65 sa Liga Pilipinas Conference 3 “Super Leg” kagabii sa Cebu Coliseum.
Ang Quezon ni Oliver Bunyi mipabuhagay sa nagpungasi nga atake sa second period sa giya ni Jorel Canizares, kinsa miposa og duha ka triples ug Hafer Mondragon nga mi-iskor og sayes puntos aron hatagan ang ilang koponan og 34-29 nga labaw sa halftime. Apan ang Stallions mibawos pinaagi sa paglusad og 20-8 run. Ang tres ni Leomer Losentes sa nahabiling 20.2 segundos maoy naghatag sa ilang koponan og uno punto nga bentaha, 51-50.
Bugtong tinguha sa Quezon mao nga dili maabot sa double digits ang labaw sa Stallions aron may paglaum pa kining makaangkon og luna sa semis karong adlawa batok sa No. 2 nga Misamis Oriental Meteors.
Ang Quezon mag-ampo nga mapilde ang Smart-Pampanga Buddies batok sa league leader M. Lhuillier Kwarta Padala Cebu Niños, nga padayon pang nagkumbati ning pagsulat. – BANAT NEWS