JS Contractors, Mang Inasal mi-iskor og daog

CEBU, Philippines - Gipukan sa JS Contractors ni Sherwin Lequit ug sa Mang Inasal ni Carlos Porras ang ilang tagsa-tagsa ka kaatbang atol sa pagsugod sa quarterfinal round sa Punta Princesa Ball Club (PPBC) 2009 Vice Mayor Mike Rama Cup basketball tournament diha sa Vicente Sotto Memorial Gym sa barangay Punta Princesa, ning siyudad.

Ang JS Contractors mipukan sa ART sa iskor nga 102-92, samtang ang Mang Inasal midaog sab batok sa Wilkris sa iskor nga 79-76.

Nagtabla ang duha ka kampo paghuman sa unang 10 minutos sa duwa, apan ang JS Contractors nanginit sa second quarter aron pagposte og 11 puntos, 48-37 ug natiwasan pa kini sa fourth quarter pinaagi sa paglusad og 40-24 rally aron pagseguro sa ilang kadaugan.

Si Reginald Taborada maoy nangu sa JS Contractors nga mihakot og 25 puntos, samtang si Bong Eleazar ug Lequit midugang og 17 ug 15 puntos. Laing tulo ka teammates ang mi-iskor sab og double figures alang sa Contractors.

Sila si Ramil Hapin ug Rowel Sumalinog parehong milansang og 18 puntos aron pangulohan ang ART.

Sa laing bahin, si Ritchie Garcia mibahog og 19 puntos aron pangulohan ang Mang Inasal, samtang ang ex-pro nga si Lou Regidor midugang og 14 puntos.

Sila si Billy Canedo ug Argiel Magan maoy nangu sa Wilkris nga nagkumboya og 30 puntos. Si Canedo mipupo og 16 puntos, samtang si Magan miani og 14 puntos.

PUNTOS MATAG USA

Unang Duwa:

JS Contractors (102) - Taborada 25, Eleazar 17, S. Lequit 15, Piliotas 12, Vallejo 11, Lequit 11, Canencia 3, Caburnay 3, Cabunilas 2, Vinalon 2, Empacis 2, Tecson 1

ART (92) - Hapin 18, Sumalinog 18, Villarosa 15, K. Arellano 14, A. Arellano 6, N. Arias 6, R. Arias 6, Libre 5, Vilbar 2, Soco 2

Ikaduhang duwa:

Mang Inasal (79) - Garcia 19, Regidor 14, Hernandez 12, Chiong 9, Pena 6, Ibona 6, Besanes 4, Porras 4, Macias 3, Flores 3, Boniel 2

Wilkris (76) - Canedo 16, Magan 14, Aria 12, Sta. Iglesia 12, Monreal 8, Mabanto 6, Panique 5, Maneja 3    (BANATNEWS)