Olea naghari sa Lapu-Lapu Fiesta Chess tourney
CEBU, Philippines - Giharian ni Amado Olea sa Philippine Air Force (PAF) ang hiusang junior-senior division sa 2009 Lapu-Lapu Fiesta Chess Tournament diha sa Lapu-Lapu City Auditorium.
Si Olea ug si Lloyd Rubillos mitapos sa torneyo uban ang managsamang 4.5 puntos, apan si Olea maoy misakmit sa titulo pinaagi sa superior tiebreak output gamit ang Bucholz system. Si Olea mirehistro og 18.5 puntos, samtang si Rubillos mitali og 15.5 puntos.
Mi-okupar sa ikatulong dapit mao si Ryan Rubillos, gisundan ni Nilo Boncanciso ug Ramil Resuera nga mipahiluna sa ikaupat ug ikalima nga dapit.
Sa laing bahin, ang managsuong Balbona miangkon sa una ug ikatulong dapit sa kiddies division 14-anyos ug paubos.
Si Felix Shaun Balbona ug si Kyle Sevillano nagtabla nga adunay 4.5 puntos, apan si Balbona maoy milangkat sa korona uban ang 20 tiebreak points batok ni Sevillano nga nakakuha og 16 puntos.
Ang igsuon ni Balbona nga si Marq Gabriel miangkon sa ikatulo nga dapit, samtang sila si Jasper Ycong ug Neil Gili mitugpa sa ikaupat ug ikalima nga dapit. (BANATNEWS)
- Latest
- Trending
