Mayol bag-ong world chamÂÂpion
CEBU, Philippines - Milampos gyud ang Sugbuanong si Rodel Mayol sa pagsakmit sa gipangandoy niining world title dihang iyang gipakuratan ang Mehikanong si Edgar Sosa aron masakmit ang WBC junior flyweight title sa ilang sangka kagahapon didto Palenque de la Feria sa Tuxla Gutierrez sa Chiapas, Mexico.Si Mayol kinsa bag-o lang mibalik og saka sa ring human sa sakit niyang kapakyasan batok ni Puerto Rican Ivan Calderon, mipakita sa hugot niyang tinguha nga makuha na sa hingpit ang world title human siya miiskor og second round TKO batok ni Sosa.
Matud pa ni Mayol nga nakita niya nga naluya si Sosa human maigo sa iyang mga kinumo og mao kini ang nakahatag kaniya og kaisog aron dabo-dabohan ang Mexican champion. "Ako nang gitinuod kay morag hinay man ang iyang sinumbagan unya masakitan man siya kon maigo nako" matud pa ni Mayol human gi-interbiyu sa Philboxing.com.
Unang gipatumba ni Mayol si Sosa sa first round, apan ang one-two combination sa Mandauehanon sa misunod nga round mao ang mitapos ni Sosa.
Nakabangon pa ang Mehikano dihang giiphan kini sa referee, apan wala na siya tuguti pa ni Mayol nga makapadayon sa ikatulong round dihang gilumsan dayun niya kini og kinumo nga maoy nakapaaghat sa referee nga ihunong ang away.
Sa maong kadaugan si Mayol kinsa ubos karon sa MP Promotions ni Manny Pacquiao mipalambo sa iyang record ngadto sa 26-2-1, 20KOs, samtang si Sosa minaog ngadto sa 37-6, 21KOs.
Sa laing bahin, napakyas ang batang Gen.San nga si Marvin Sonsona nga mouli bitbit ang iyang bakus dihang gibawi kini human siya milapas og duha ka libras sa gikan sa catch weight nga 115 lbs.
Hinuon, gipadayon gihapon ni Sonsona ang away batok sa Mehikanong si Alejandro Hernandez, apan misangpot lang kini ngadto sa panagtabla sa iskor nga 114-114. Tungod niini,nabakante karon ang WBO super flyweight title.
Sa laing bahin, midaog sa undercard ang lumad nga taga-Talibon Bohol nga si Ciso Morales batok sa Mehikanong si Miguel Gonzales. Ang superbantam weight prospect nga si Morales mi-iskor og majority decision nga kadaugan batok ni Gonzales aron panalipda ang iyang walay buling nga record. – BANAT NEWS
- Latest
- Trending
