Wade mibaswat sa Heat

CEBU, Philippines - Gisalbar ni Dwyane Wade ang Miami Heat pinaagi sa pagpasulod sa iyang three-pointer may 0.1 segundo ang nahibilin sa duwa batok sa New Jersey Nets, 81-80 kagahapon sa nagpadayong 2009-2010 NBA season didto sa ilang korte sa American Airlines Arena sa Miami, Florida.

Naglabaw pa unta ang Nets, 80-78 sa wala pa ang tirada ni Wade hinungdan wala pa gihapo’y daog ang Nets sulod sa napulo ka duwa sa ilang 0-10 nga baraha.

“We designed the play for him to have an open drive to the rim, possibly to get the free throw line,” Apan inay mo-drive, lahi ang gihimo ni Wade ug mitira kini’g tres nga maoy mibaswat sa Heat.

Si Udonis Haslem maoy nangu sa Heat sa iyang 28 puntos ug 12 ka rebounds samtang si Wade may 22 puntos ug si Quentin Robinson may 13 puntos.

Parehong may 17 puntos sila si Brooks Lopez ug Trenton Hassell alang sa Nets.

Ang Heat aduna nay 7-2 nga baraha.

Sa laing duwa, gipakuratan sa Oklahoma City Thunder ang host San Antonio Spurs, 101-98 didto sa AT &T Center sa San Antonio, Texas.

Ang 5-4 nga Thunder gipangulohan ni Kevin Durant kinsa mi-iskor og 25 puntos ug si Jeff Green midugang og 21 puntos, Si Russell Westebrook miposa og 19 puntos ug mihakot og 11 ka rebounds.

Si Tim Duncan maoy nangu sa Spurs pinaagi sa iyang 22 puntos ug sila si George Hill ug Tony Parker may 18 ug 17 puntos matag usa apan igo lang nakahimo og siete puntos si Manu Ginobili kinsa bag-o lang mipahibalo sa umaabot nilang anak nga kaluha.

Sa laing bahin, midaog ang Atlanta batok New Orleans, 121-98, na-upset sa Indiana ang Boston, 113-104, naka-ipsot ang Detroit batok sa Washington, 106-103, midaog ang Portland batok sa Charlotte, 80-74, naka-ipsot ang Cleveland batok sa Utah, 107-103, gisungay sa Chicago ang Philadelphia, 94-88, midaog ang Memphis batok sa Minnesota, 97-87 ug naka-eskapo ang Milwaukee batok sa Golden State, 129-125. - GGM gikan sa NBA.com (BANAT NEWS)