3-peat lisud kab-oton

CEBU, Philippines - Miangkon si Norman Black, ang head coach sa Ateneo Blue Eagles nga lisud kaayo pagkab-ot og three-peat o pagdaog og tulo ka sagunson sa men’s title sa UAAP sa sunod season tungod sa pag-gradwar sa tulo niya ka mga sinaligan, kinsa maoy daku kaayo’g natabang alang sa ilang kampanya sa pagsakmit og back-to-back titles.

”We will see. It’s hard to talk about it now. It’s still November,” matud pa ni coach Black nga nahinabi sa Banat News.

Si Black nakuhaan og pamahayag atol sa iyang pagbisita dinhi sa Sugbu uban ni Ateneo team manager Paolo Trillo niadtong Biyernes sa gabii dihang gidapit sila alang sa kalihukan sa Ateneo Alumni Association-Cebu Chapter ubos ni president Jack Huang, kinsa nagsaulog sa ilang Ateneo Blue Night didto sa Northwing lobby sa SM City.

Si Black, kinsa bag-o lang usab nagsaulog sa iyang adlaw'ng natawhan niadtong Nobiyembre 12, nagkanayon nga dili sayon ang pagpangita og ikapuli sa tulo niya ka players nga sila si Jai Reyes, Nonoy Baclao ug back-to-back MVP Rabai Al-Hussaini. Apan matud pa niya nga aduna siya’y mga bag-ong talento nga maoy moabag sa mga beterano sa umaabot nga UAAP season.

Usa sab sa mi-gradwar mao ang Sugbuanong si Christopher Sumalinog, anak ni kanhi UV Lancer Hermes Sumalinog Sr., kansang katapusang pagduwa ning tuiga isip sakop sa Eagles mao ang batok sa University of the East (UE) Red Warriors atol sa ilang best-of-three finals diin sila midaog sa 2-1 nga baraha.

Si Sumalinog, usa sa tulo ka mga anak ni Hermes Sr. nga pulos didto niduwa sa Manila, lakip na sila si Michael, kinsa nakaduwa sa UST Growling Tigers ug Hermes Jr. sa Mapua Chirping Cardinals. Migradwar isip usa ka dean’s lister nga nakahatag og dugang dungog ngadto sa iyang amahan nga si Hermes Sr.

Atol sa yanong kalihukan, sila si Black ug Trillo nakadawat sab og certificate of appreciation.

Ang Ateneo Blue Night gitumong aron sa pagsaulog sa ika-150th nga founding anniversary sa Ateneo ug sa Jesuits education sa tibuok Pilipinas ingon man usab pagsaulog sa ilang nakab-ot nga kadaugan sa UAAP.

Matud pa, ang Ateneo nahimutang na karon sa ika-234th nga ranggo sa mga maayong tunghaan sa tibuok kalibotan.

Mitambong sab sa maong kasaulogan ang pipila ka mga Ateneo alumni nga mahiligon sa sports nga sila si Cebu Landmasters-Mandaue team owner Joe Soberano ug si Danao City Sports Commission chairman ug cyclist Oscar “Boying” Rodriguez.   (BANATNEWS)