Catmon nangharos sa 5th GUV Cup

CEBU, Philippines - Giharos sa municipal cluster defending champion Catmon ang men ug women's divisions sa Cluster V sa 5th Governor Gwen Garcia Unity Volleyball (GUV) Cup niadtong Domingo didto sa Catmon Sports Complex.

Ang Catmon women’s volleyball team ni coach Vilma Veloso misakmit sa ikaupat nilang cluster championship human nila gitapos ang torneyo bitbit ang 4-0 win-loss record.

Gipukan sa Catmon ang uban pang lig-ong mga koponan nga naglakip sa Borbon, 25-7, 5-9, San Francisco 25-5, 25-4 ug Pilar 25-3, 25-8, sa wala pa nila gidemolis ang Sogod team, 25-17, 25-23.

Si MVP Cherry Petalcorin mao ang nangulo sa Catmon sa ilang sangka batok sa Sogod.

Gawas ni Petalcorin, ang powerhouse nga Catmon gilangkuban usab sa Palarong Pambansa medalists nga sila si Methoseena Bate, Athena Sucalit, Catherine Marquez, Lanie Silvestre, Jerymie Montalvo, Gretchel Soltones ug Cristy Sucalit.

Sa men’s bracket, ang Catmon spikers miharos usab sa torneyo dala ang 3-0 nga baraha.

Gipukan sa Catmon ang Carmen, 25-17, 25-17, San Francisco 25-16,25-17 ug Poro 26-6, 25-23.

Laing kulbahinam nga duwa ang masaksihan karong Sabado diin Liloan volleybelles modepensa sa ilang titulo sa Cluster VI didto sa Compostela, Cebu. – BANAT NEWS