Eddiegul dinapit sa Sportsworld

CEBU, Philippines - Ang presidente sa University of the Visayas (UV) ug 1st District Congressman Eduardo R. Gullas maoy dinapit sa Sportsworld nga pagadumalaon ni Bobby Inoferio karong alas-10 sa gabii sa CCTN Channel 47.

Si Gullas, kinsa nailhan sab   nga "Eddiegul," mohisgot sa halapad niyang kasinatian sa politika ug iya sab nga hisgotan ang kalamposan sa iyang team UV Green Lancers sa bag-o lang natapos nga Cebu Schools Athletic Foundation, Inc. (CESAFI).

Ang Green Lancers misakmit sa ikasiyam nilang sunod-sunod nga kampiyonato human nila gipukan ang University of Cebu (UC) Webmasters.

Si Gullas kanunay mohatag og mga tips ngadto sa Lancers matag praktis nila sa UV gym. Player sab siya kaniadto ug nahimong coach sa Green Lancers. Nahimo siyang champion coach sa national inter-collegiate niadtong sayong bahin sa 1950.

Gawas sa iyang abilidad sa basketbol, usa sab ka malampusong politiko si Gullas, kinsa nahimong gobernador sa Sugbu, nahimong kongresista sa unang distrito sa lalawigan sa Sugbu, nahimong mayor sa dakbayan sa Talisay ug napili pagbalik pagka-kongresista sa maong distrito nga gilangkuban sa Talisay, Minglanilla, Naga, San Fernando, Carcar ug Sibonga. – BANAT NEWS