Jonel's, RCAF midaog sa BLBA caging

CEBU, Philippines - Parehong mirehistro og kulbahinam nga kadaugan ang Jonel’s Trucking ni team owner Joey Cal ug ang RCAF ni Romy Faunillan batok sa tagsa-tagsa nila ka kaatbang sa Barangay Labangon Basketball Association (BLBA) Christmas tournament diha sa Labangon Sports Complex.

Apan ang Jonel’s nagkinahanglan pa og duha ka overtime una nila mapilde sa hingpit ang G.I. Rion sa iskor nga 121-114, samtang ang RCAF naka-eskapo bitbit ang 115-114 nga kadaugan batok sa Guanino Pharmacy.

Ang G.I. Rion squad miposte og 31-17 nga abante sa sayong bahin sa duwa luyo sa paningkamot nilang Michael Arias ug Boboy Osmeña ngadto na sa third period, 78-68.Apan kalit lang misumbalik ang Jonel’s sa fourth period dihang ang kanhi USP Panther guard nga si Erik Espinosa mipasulod og three-pointer sa nagkaupos nga oras aron tablahon ang iskor sa 98-all nga miresulta sa unang overtime.

Unang nakabuylo ang Jonel’s sa overtime, apan si Dodong Espinosa sa G. I. Rion mibugha og duha ka free throws aron tablahon ang iskor, 109-all nga naghatod sa duwa ngadto sa ikaduhang overtime.

Wala na mokompiyansa ang Jonel's sa second overtime diin milusad kini og 12-5 run ug wala na kini magpahulga pa sukad niadto aron maangkon ang makutas nga kadaugan.  

Si Espinosa mikabkab og 33 puntos ug si Rowel Sumalinog mikubkob og 25 puntos aron pangulohan ang Jonel’s. Si Petoy Mata miamot og 15 puntos alang sa Jonel's nga nagbitbit og 6-1 nga baraha.

Si Dodong Espinosa mirehistro og tournament record nga 42 puntos alang sa G.I. Rion.

Sa laing duwa, si Danrey Baclay mi-iskor og 35 puntos alang sa RCAF nga adunay   7-2 nga baraha.

Sila si Noel Talas ug Harry Reyes mao sab ang nangulo sa Guanino Pharmacy nga nagkumboya og 53 puntos. 

Puntos Matag Usa

Unang duwa:

Jonel’s (121) - E. Espinosa 33, Sumalinog 25, Mata 15, Villarta 12, Elizondo 11, Lans 7, de Gracia 5, Navaja 4, Cal 3, Castro 2, Quiroz 2, Cabilla 2

G. I. Rion (114) - D. Espinosa 42, Arias 16, Osmeña 14, Beltran 11, Mosqueda 10, Batad 9, Rico 6, Magallanes 4, Quijada 2

Ikaduhang duwa:

RCAF (115) - Baclay 35, A. Tabasa 31, Del Campo 22, Espinosa 12, Faunilan 0, Dignos 3, L. Tabasa 2

Guanino (114) - Talas 30, Reyes 23, McCall 17, Requema 10, Arnoco 8, Abatayo 7, Zapanta 7, Parba 6, Trinidad 5, Navaja 1. – BANAT NEWS