RP mountainbike team mamawi sa SEA Games

CEBU, Philippines - Masaligon gihapon si RP mountainbike coach Renato Mier nga makarekober human sa dili maayo nilang performance sa miaging 2009 Asian Mountainbike Championship niadtong weekend didto sa Malaysia.

Paninguhaon sa RP team ubos ni Mier nga makapakita og maayong performance atol unya sa ilang pagsalmot sa South East Asian Games sa nanghinapos nga bahin ning tuiga didto sa Laos.

Matud pa ni Mier, nga duha sa mga RP bets nga sila si Niño Surban sa cross-country ug Eleazar Barba sa downhill, ang naglukdo karon og dakung kahigayonan nga molampos sa umaabot nga SEA Games.

Ang anak ni Mier nga si John Rene, nga dili sakop sa RP elite mountainbikers   milampos pagsulod sa top 10 niadtong weekend.

Si Surban nahimutang sa ika-20 sa 40 ka mga starters, samtang si Marites Bitbit napakyas paghuman sa lumba tungod sa mechanical trouble.

 Si Eleazar Barba Jr. sa Dumaguete mipahiluna sa ika-18 sulod sa 24 ka mga riders sa iyang unang lumba.

 Sa men’s elite action, si Surban mihuman sa lumba   sa oras nga 17 minutos, gisundan ni gold medalist   Kohei Yamamoto sa Japan. 

 Hinuon, si Surban misaad nga mamawi sa lain pang international race nga iyang pagasalmotan sa dili pa siya mosikad karong Disyembre 9 batok sa mas kusgan ug paspas nga mga riders didto sa Laos. – BANAT NEWS