PBA Legends

CEBU, Philippines - Nakadawat ako og text gikan ni Bonel Balingit, ang labing unang higante nga produkto sa UV Green Lancers ug kanhi player sa PBA nga nagpahibalo kanako kalabot sa iyang proyekto nga gitawag ug PBA Legends batok UV Green Lancers.

Kining iyang promotion usa kini ka tour diin ang iya kanhing mga higala sa PBA makigsangka batok sa mga bag-ong Lancers nga lab-as pa sa ilang paglangkat sa ika-siyam nga korona sa CESAFI niadto lang Oktubre 29 didto sa Cebu Coliseum diin ilang gipukan ang UC Webmasters sa ilang best-of-five championship series sa 3-1 nga baraha.

Lahi kining iyang promotional tour sa PBA Legends nga moduwa diha sa Cebu Coliseum batok sa Cebu Niños.

Unang moduwa ang Legends didto sa Toledo City sa Nobiyembre 28 ug dayon moduwa sila didto sa Ormoc City ug taposon ang tulo ka adlaw nga tour didto sa Kananga, Leyte sa Nobiyembre 30.

Daan nang gikontrata ni Balingit kining inyong alagad sa SPORTSgab nga maoy mo-cover sa ilang duwa ug mokuyog sa ilang paglarga. Dili kita makabalibad sa hangyo ni Balingit ug labaw nang dili kita makabalidad kay duwa man kini sa UV.

Ang PBA Legends pagalangkuban ni Balingit mismo ug ang iyang mga kauban sa team mao kining mosunod; Vergel Meneses, Johnny Abarrientos, Jun Limpot, Jerry Codinera, Ato Agustin, Bobby Jose, Peter Naron, Jimwell Torion, Gilbert Demape ug ang duha ka coaches sa Lancers nga sila si Boy Cabahug ug Al Solis.

Si Agustin maoy rookie ug champion coach sa San Sebastian Stags sa NCAA dihang ilang gi-sweep ang San Beda Red Lions sa ilang best-of-three title series didto sa Araneta Coliseum.

Sayo ning tuiga, miduwa sab sila si Balingit ug PBA Legends didto sa Cordova batok sa Pink Tower Selection ug gipaluyohan sa JJ Farr Promotions.

Sa wala pa si Balingit moduwa sa UV, nag-itsa itsa lang intawon siya og bola nga uway ug ang iyang gigamit nga ring gilansang sa nagbarug nga punoan sa lubi ug kung adunay matagak nga potot, ila sab kining gamiton isip bola.

Daw kataw-anan paminawon ug dili katuhoan apan kini maoy labing tinuod. Gikan sa kaliwat nga kabus sila si Balingit didto sa iyang natawhan sa Kapatagan, Lanao del Norte. Pagduwa niya sa UV, walay mosukod nga sapatos busa, made-to-order ang iyang sapatos nga adto orderon sa pamilyang Gullas sa laing nasud.

Mas pabor gani kini karon si June Mar Fajardo sa UC nga gikan sa lungsod sa Pinamungajan kay diyutay rang panahon ang iyang pag-antos nga walay sapatos tungod kay karon, nag-ilog ang mga alumni sa UC pagpalit og sapatos kang Fajardo ug sa kadaghan sa iyang sapatos, gi-agop-op na ang uban. Ang labing uwahi niyang nadawat mao ang brand new Nike nga gipalit kaniadtong miaging tuig sa akong higala nga mipanaw na nga si Allan Ceniza o Alcen didto sa New York City.

Makahinumdom ako nga pag-abot gyud ni Balingit sa Sugbo ug magsuroysuroy sa Fuente Osmeña, mura siya'g artista nga kanunay tan-awon sa mga tawo. Dihang mi-order kami sa Larsian og beer, ang iyang gikuptan mao ang beer grande ug ang amoa gamay nga botelya apan kung imong tan-awon mura sa usab og gamay nga botelya ang iyang gikuptan tungod sa kadako sa iyang kamot.

Dihang misulod siya sa opisina sa Freeman, among gipatungtong si Bordie Tabada sa lamesa ug gipabarug si Bonel apan sa hulagway, mas taas gihapon siya kang Bordie kinsa namatay na usab.

Matod pa ni Bonel, ang labing unang isyu sa Freeman nga migawas kadtong iyang hulagway, anaa pa karon iyang gitagoan sa ilang balay sa Lanao del Norte ug dili kuno matukib sa pulong ang iyang kalipay dihang migawas sa news ang iyang ngalan.

* * *

Gitapos kagahapon ang duha ka nagdungan nga torneyo—— 2nd Nokia RP Youth Invitational basketball championships ug ang Philippine Collegiate Champions League (PCCL) zonal eliminations didto sa USC gym ug sa Cebu Coliseum.

Sa kasamtangan nag-una ang Adamson U Falcons sa ilang 2-0 nga baraha apan adunay purohan nga makasulod sa Sweet 16 ang UC Webmasters. Sa Under 16, dako sab kaayong posibilidad nga bombahan sa Pilipinas ang Iran arong paglangkat sa kampiyonato.

Ning pagsuwat wala pa nato hisayri ang opisyal nga resulta sa duwa apan atong pasalamatan ang mga basketball fans sa ilang pagsuporta sa duha ka torneyo.

Maanindot kaayo ang duha ka proyekto ug salamat sab sa Nokia ug sa Rotary Club of Cebu Fuente ni Rady Abarintos ug sa mga opisyales sa PCCL ug CESAFI pinangulohan nilang coach Joe Lipa ug commissioner Felix Tiukinhoy.

Sa sunod Lunes, atong hisgotan dinhi sa atong lindog ang resulta sa away nilang Manny Pacquiao ug Miguel Cotto. Atangi mga suki sa Banat Sports kay segurado akong malingaw kamo.

SG. Miscellaneous. Advance wedding anniversary to Boy and Gigi Quindao this coming November 11. The mass will be officiated by Fr. Mannix of the Archdiocese of Maasin, Leyte. -  BANAT NEWS