Adamson abante sa Sweet 16

CEBU, Philippines - Miabante na ang Adamson University (AU) Falcons ngadto sa Sweet 16 dihang naka-eskapo kini gikan sa mga kamot sa University of San Jose-Recoletos (USJ-R) Jaguars, 84-81 sa nagpadayong Cebu leg sa Philippine Collegiate Champions League (PCCL) zonal eliminations kagabii diha sa Cebu Coliseum.

Ang Falcons miposte sa ilang dakung labaw sa third quarter, 60-45, apan nahiyos kini sa halftime, 39-30.

Nagguba ang duwa sa Falcons sa final period nga naghatag og higayon sa Jaguars pagkitkit sa labaw ngadto na lang sa dos puntos, 69-67 hangtod nga gibunlot ni Rioder Cabrera ang nagkamang nilang iskor.

Ang Falcons gilupig sa Jaguars sa pinuntosay, 20-15 sa dihang si Jaymar dela Peña milansang og triple, 61-69 sa fourth period ug bisan pa, ang Falcons nakahimo gihapon sa pagbangon sa nahabiling kuwatro minutos sa duwa.

Sila si Alvin Margallo ug Janus Lozada parehong miposte og 15 puntos aron pangulohan ang Falcons, samtang sila si Jan Julius Colina ug Eric Camson miamot og 14 puntos matag usa.

Ang pilderong Jaguars gipangulohan sab ni Dela Peña pinaagi sa iyang 18 puntos.

PUNTOS MATAG USA

Adamson (84) - Margallo 15, Lozada 15, Colina 14, Camson 14, Cabrera 10, Galinato 7, Cañada 7, Alvarez 2

USJ-R (81) - Dela Peña 18, Lapiz 16, Amores 13, Alquizola 7, Duran 7, Bibera 5, Nudalo 3, Dela Rama 2