Iran nakalingkawas sa overtime

CEBU, Philippines - Gipahimuslan sa Islamic Republic of Iran ang ilang gitas-on aron mapukan ang Chinese-Taipei, 93-81 sa overtime atol sa pagsugod sa 2nd Nokia Pilipinas Under-16 Youth Invitational Basketball Championships kagahapon diha sa University of San Carlos (USC)-main gym sa dalan Sanciangko.

 Hinugtanay sa bakus ang nahitabong aksiyon sa duha ka kampo, apan ang Iran mipatuman sa ilang hugot nga depensa ug wala na nila hatagi’g higayon nga mo-iskor ang kontra human magtabla, 81-all nga miresulta sa overtime.

Ang five-point swing forward sa Iran nga si Soheil Yousefi maoy nagduslit ngadto sa mainitong rally sa overtime diin ilang gisirohan ang ilang kaatbang 12-0 aron modaog sab og 12 puntos

Si Yousefi maoy nangulo sa opensiba sa Iran pinaagi sa pagpabuto og 24 puntos, gisundan ni Amir Sedighi nga misansan og 13 puntos ug Mir Mohammad Mir Fattahi nga mi-iskor og 11 puntos.

Si Chen Ying Chun, mao sab ang nangulo sa habig sa Chinese-Taipei nga mi-iskor og 31 puntos. Laing duha niya ka teammates ang mirehistro sab og double figures. Si Chung Wei-ping mi-iskor og 19 puntos ug si Chen Kuan-Chuan miabuno og 11 puntos.

Ning pagsuwat, ang host RP Youth nga gipangulohan sa batan-ong si Keifer Ravena padayon pa nga nakiggubat batok sa Japan.

Ang torneyo padayonon karon diin ang Iran makigsangka sa Japan sa alas-5:30 sa hapon, sundan sa duwa tali sa RP Team batok sa Chinese-Taipei sa alas-7 sa gabii diha gihapon sa USC gym.

Puntos Matag Usa

IR Iran (93) - Yousefi 24 Mashayekhi 16 Sedighi 13 Mir Fattahi 11 Zangeneh 7 Monji 6 Taherikolahdoz 6 Behzadi 5 Faghihparvar 4 Abediaraei 1

Chinese-Taipei (81) - Chen 31 Chung 19 Chen 11 Yang 7 Wang 5 Wu 2 Kao 2 Wen 2. – BANAT NEWS