Aguilar naghari sa Caduawan motocross

CEBU, Philippines - Subli na sab nga gipakita ni Glenn Aguilar ang talagsaon niyang abilidad nga nakapahimo kaniyang national champion sa makadaghang higayon dihang iyang gidominar ang Expert ug Pro Open division sa 14th leg sa 2009 MS Motosuit Motocross Series niadtong Sabado didto sa barangay Caduawan sa Tabogon, Cebu.

Si Aguilar, ang 11th-time national champion mipuhal ni Irwin Uypitching sa Rusi Rusco Racing Team ug Paulo Inoc sa SEL-Racing Team aron pagsakmit sa korona sa expert category.

Nalabni sab ni Aguilar ang titulo sa pro open dihang iya sab nga gipilde si Jonjon Adlawan sa PSR Racing Team ug si Uypitching, nga mi-okupar sa ikaduha ug ikatulo nga dapit.

Si Dongkey Sanchez midaog sab og duha ka titulo human midominar sa local enduro ug open novice enduro.

Sila si Rey Querol ug JC Obligado maoy miangkon sa ikaduha ug ikatulo nga dapit sa local enduro. Si Bonie Bustillo mipahiluna sa ikaduha sa open novice enduro, samtang si Querol nalabay sa ikatulo.

Sa intermediate division, si Jubenille Abellar maoy niangkon sa korona human niya gipilde sila si Inoc ug Clark Wagas alang sa ikaduha ug ikatulo nga dapit.

Wala sab magpabitin si Jonjon Flores dihang iyang nailog ang korona sa novice open production batok nilang Siegfred Ornopia ug Ryan Querol.

Hinuon, si Ornopia sa Keiz BJ Racing Team padayong naghari ug maoy milangkat sa korona sa executive A batok nila ni Jun Enriquez ug Nonoy Reluya. Apan si Enriquez maoy nanghawod sa executive B batok nilang Andy Kricle ug Joel Andrin. Hinuon, si Kricle nakabitbit sab og korona dihang iyang gidominar ang executive C batok nilang Flores ug Bioping Chua.

Ang anak ni Ornopia nga si Earl Jean Brylle miharos og duha ka titulo human niya gidominar ang mini pantra ug mini 65 divisions.

Gipukan ni Brylle sila si Tomtom Largosa ug Junrey aron langkaton ang korona sa mini pantra. Iya sab nga nalangkat ang korona sa mini 65 division dihang iyang gipilde ang iyang manghod nga si Ken Ornopia ug Largosa nga nahimutang sa ikaduha ug ikatulong dapit.

Pakyas si Brylle pagposte og triple championships dihang napuhalan ang iyang katakus ni JC Obligado kinsa milangkat sa titulo sa local selection category.

Sa peewee 7-below, si BJ Pepito maoy midaog sa korona batok sa managsuong Kenken ug Keizer Ornopia.

Ang peewee 5-below gidominar sab ni Joseph Enriquez batok nilang Vinz Batulan ug Keizer Ornopia.

 Ang maong lumba nga gipasiugdahan sa Keiz BJ Motors nga kabahin sa tinuig nga kapistahan sa ilang mahal nga patron Mother of Perpetual Help gipaluyohan sa Castrol Power 1, Sunriser Motorcycles, JIGMA Construction, Mayor Erwin Agustino, Cebu Fourth District Congressman Benhur Salimbangon.

Ang usa ka adlaw nga kompetisyon gipaluyohan ni Felipe Montejo, Capt. Manuel Wagas, Noel Solon, Edmund Pingkian, Back to Back Motorcyle, RMO Parts Shoppe, F&FO Motor Parts, Cebu Reliance Motor Parts, MS Unlimited, MS Digital, Manang Lourdes Furniture, Reynante Tigue, Opo Gemelino, Aidorg Mktg., Global MFG Corp., NS Trading ug Pepito Asignar. – BANAT NEWS