Gorres handang-handa nang sumabak

MANILA, Philippines - Handang-handa na si da-ting world title contender Z "The Dream" Gorres para sa kanyang non-title super flyweight fight kay Colombian Luis Melendez sa Nobyembre 13 sa House of Blues sa Mandalay Bay sa Las Vegas, Nevada.

Magsasagupa sina Gorres at Melendez isang araw bago ang "Firepower" nina Filipino boxing superstar Manny Pacquiao at Puerto Rican world welterweight champion Miguel Cotto sa MGM Grand Garden Arena sa Las Vegas.

Ayon kay Filipino trainer Edito Villamor, umabot na sa 36 rounds ang naging sparring ni Gorres sa Wildcard Boxing Gym ni Freddie Roach sa Los Angeles, California.

Ang mga sparring partners ng tubong Cebu City ay isang Mexican at Scottish fighter.

Sakaling manalo kay Melendez, nangako si Bob Arum ng Top Rank Promotions na isasama niya ang pangalan ni Gorres sa susunod na "Pinoy Power" sa Pebrero 13, 2010 sa Las Vegas Hilton.

Umiskor ang 28-anyos na si Gorres ng unanimous decision kay dating world champion Cruz Carbajal noong Setyembre 12 sa Tepic, Mexico, habang nanalo naman ang 29-anyos na si Melendez kay Rafael Salgado via third-round TKO noong Setyembre 9.

Ibinabandera ni Gorres ang 30-2-2 win-loss-draw ring record kasama ang 19 KOs kumpara sa 26-3-1 (21 KOs) ni Melendez, kagaya ng Pinoy ay natalo rin kay Mexican Fernando Montiel para sa World Boxing Organization (WBO) super flyweight belt noong Oktubre 4, 2007.

Nasa kasagsagan rin ng kanyang preparasyon si Filipino light welterweight sensation Mark Jason Melligen para sa kanyang laban kay Mexican Michel Rosales sa boxing card nina Gorres at Melendez.

Dala ng 23-anyos na si Melligen ang 16-1-0 (12 KOs) kontra sa 24-3-0 (21 KOs) slate ni Rosales, habang makakatapat ni Federico Catubay (25-15-3, 13 KOs) si Juan Alberto Rosas (30-5-0, 25 KOs) ng Mexico para sa International Boxing Federation (IBF) super flyweight title eliminator. (Russell Cadayona)