CEBU, Philippines - Midaog na sab ang Cebu Unique Trade Center human ilang gipukan ang mas lig-on nga AMBL Enterprises, 103-97, samtang gilubong sab sa Heartvit ang J-Art Sportsmasters, 121-93 sa 1st Punta Princesa Ball Club (PPBC) 2009 Vice Mayor Mike Rama Cup diha sa Vicente Sotto Memorial Gym sa barangay Punta Princesa, ning dakbayan.
Ang Unique Trade miposte og 51-46 nga bentaha sa halftime ug ila pa kining giinat ngadto sa 77-70 paghuman sa ikatulong kuwarter ubos sa pagtambayayong nilang Rolly Catubig ug Balong Navarro.
Giharian sab si Ronel Tiu kinsa mi-iskor sa tanan niyang 14 puntos sud sa fourth period aron tabangan ang Unique Trade pagposte og daog.
Si Catubig maoy nangulo sa Traders pinaagi sa iyang 27 puntos, samtang si Navarro mikadlit og 18 puntos, samtang sila si Dindo Sausa ug Tiu parehong milansang og 14 puntos
Sila si Robert Abasolo ug Lito Navarro maoy nangulo sa AMBL nga nagkumboya og 55 puntos.
Sa laing bahin, si Alfred Lim mipabuto og 22 puntos aron pangulohan ang Heartvit, samtang ang mga guwardiya nga sila si Reynold Zamora ug Efren Mosqueda mitira og 14 puntos matag usa.
Puntos Matag Usa
Unang duwa:
Cebu Unique Trade (103) - Catubig 27, B. Navarro 18, Tiu 14, Sausa 14, Navarro 12, Faunillan 10, Batoon 5, Libre 3
AMBL (97) - Abasolo 23, L. Navarro 22, Felicitas 14, A. Lim 11, Alesna 11, Ibona 8, Ramos 8
Ikaduhang duwa:
Heartvit (121) - F. Lim 22, Zamora 14, Mosqueda 14, Y. Reyes 13, Jumamel 12, Tagalog 10, Babatid 9, Arias 9, C. Reyes 6, Sanchez 6, Pasana 6
J-Art (93) - Noel 19, Ferrer 18, Birao 15, Perez 15, Mante 14, Te 6, Regidor 4, Villaber 2, Bucton 2. - Gabby G. Malagar (BANAT NEWS)