CEBU, Philippines - Nahaon na ang tanan alang sa Philippine Collegiate Champions League (PCCL) zonal eliminations nga gikatakda karong Nobiyembre 5-8 diha sa Cebu Coliseum.
Upat ka teams ang magsangka alang sa luna sa Sweet 16. Kini mao ang University of Cebu (UC) Webmasters, University of San Jose-Recoletos (USJ-R) Jaguars, Adamson University (AU) Falcons ug ang San Sebastian College Recoletos-Cavite.
Sa opening game, ang Falcons makigsangka batok sa UC Webmasters, kinsa napukan ngadto sa University of the Visayas (UV) Green Lancers sa kampiyonato sa 9th Cebu Schools Athletic Foundation Inc. (CESAFI) season, samtang ang San Sebastian makigsangka sa ilang igsuong koponan USJ-R Jaguars.
Ang upat ka adlaw nga torneyo nga gipasiugdahan sa CESAFI pinaagi sa ilang commissioner Felix 'Boy' Tiukinhoy Jr., mosubay og single round robin format, diin ang top two teams mag-ilog sa korona sa tinaktakay nga kampiyonato unya sa Nobiyembre 8.
Ang modaog makaangkon og luna alang sa Sweet 16 diin ang UV Green Lancers nakabaton og automatic slot isip reigning CESAFI champion. (BANATNEWS)
==========