Niños vs. Meteors sa Zamboanga leg finals

CEBU, Philippines - Magsugat na usab ang dalan sa duha ka higpit nga karibal -- ang defending National Champion Misamis Oriental Meteors ug kanhi kampiyon nga M. Lhuillier Kwarta Padala-Cebu Niños alang sa kampiyonato sa Zamboanga City Leg karong adlawa sa Smart Liga Pilipinas Conference III didto sa Summit Center sa Universidad de Zamboanga.

Sa dili pa sugdan ang ilang sangka sa alas-6 sa gabii, magtakus una ang host team Zamboanga Uno Latinos batok sa EKB-Apayao Rapids sa alas-4 sa hapon alang sa ikatulong puwesto.

Ang Meteors ug Niños miabante sa finals bitbit ang managsamang 2-0 win-loss records human nila gipanglampaso ang ilang tagsa-tagsa ka mga kaatbang sa semi-finals.

Ang Meteors ni Gov. Oscar S. Moreno ug coach Jun Noel milubong sa Latinos, 122-77 aron makuha ang katapusang lingkoranan sa finals.

Si Melvin Mamaclay maoy nangulo sa Meteors sa iyang 24 puntos uban ang 10 ka rebounds, gisundan ni Patrick Cabahug nga mitira og 21 puntos, samtang si Christopher Concepcion mao ang topscorer alang sa Latinos pinaagi sa iyang 24 puntos, gisundan ni Charleston Bolias sa iyang 14 puntos.

Sa maong kadaugan, nasakmit sa Meteors ang ikaduhang luna alang sa Super Leg nga gikatakda karong Nobiyembre.

Sa laing bahin, ang Niños ni Michel J. Lhuillier ug coach Raul 'Yayoy' Alcoseba miinat karon sa ilang winning streak ngadto sa 14-0 human usab nila gipanitan ang Rapids ni Gov. Elias K. Bulut sa iskor nga 107-72.

Ang legendary coach nga si Alcoseba nagkanayon nga tumong nila nga mabalik sa Cebu ang kampiyonato human sila mapakyas sa ilang kampanya sa miaging season dihang napilde sila sa Meteors sa Finals.

Si Richard Ian Saladaga mikadlit og 18 puntos uban ang upat ka assists ug ang beteranong si Stephen Padilla mikabkab og 13 puntos alang sa Niños.

Ang Rapids gipangulohan sab ni Leimar Navarro nga mipupo og 12 puntos, gisundan ni Gester Ebuen nga miani og 11 puntos.

Puntos Matag Usa

Cebu (107) – Saladaga 18, Padilla 13, Dacia 11, Nailon 10, Santos 10, Mepana 10, Malinao 8, Poligrates 8, Ababon 7, Magsumbol 5, Enriquez 3, Basco 2, Escobal 2.

Apayao (72) – Navarro 12, Ebuen 11, Yambao 10, Junio 10, Dizon 6, Vitug 5, Santos 4, Cruz 3, Bonus 3, Evangelista 2, Cabico 2, Lustestica 2, Villareal 2. - – BANAT NEWS