Korona birahon na's Lancers?

CEBU, Philippines - Nakabangon ang University of the Visayas (UV) Green Lancers human masugamak sa dihang ilang gilubong ang higpit nga karibal University of Cebu (UC) Webmasters, 81-67 aron pagbaton og 2-1 nga abante sa ilang "best-of-five" finals series sa 9th Cebu Schools Athletic Foundation Inc. (CESAFI) men's basketball event niadtong Martes sa gabii diha sa Cebu Coliseum.

Ang UV Lancers ni coach Elmer 'Boy' Cabahug, posibleng molangkat sa ilang ikasiyam nga sunod-sunod nga korona kun ilang madaog ang Game-4 karong gabii. Apan kinahanglan nga magbinantayon ang UV Lancers kay ang UC Webmasters seguradong moladlad sa tanan nilang abilidad aron mahayagan pa ang ilang kampanya ug ingon man malugwayan pa ang serye.

Hingpit gyud nga gidominar ni 6-foot-11 Gregory Slaughter ang iyang kaatbang sa Webmasters ang 6-foot-9 nga si June Mar Fajardo aron ipakita kun unsa siya kaandam modaog og laing korona sa dili pa siya mobiya sa Lancers.

Si Slaughter, kinsa anaa karon sa iyang katapusang tuig pagduwa uban sa UV mao gihapon ang nangulo sa kadaugan pinaagi sa pagpabuto og 22 puntos. Ang perimeter shots ni Slaughter makapainat sab sa kilay ug tataw nga iyang napuhalan si Fajardo halos sa tanang departamento sa duwa.

Gani, wala na mahasol si Slaughter og pamuntos sa ilawom tungod kay misaler man ang iyang outside shooting nga maoy nakapalabad sa ulo sa Webmasters.

Si Ritchum Dennison mibunal og 17 puntos, apan ang daku'g natabang alang sa UV Lancers mao ang guwardiya nga si Eman Calo, kinsa mihimo og 15 ka fastbreak points. Si Harold Cincoflores mi-iskor sab og double figures pinaagi sa iyang 10 puntos.

 Sa gihapon, si Fajardo mao gihapon ang nangulo sa Webmasters pinaagi sa iyang 24 puntos. Mas daghan pa unta ang iyang mapupo nga iskor kun wala pa barawa ni Slaughter ang iyang mga tirada.

Wala sab makatabang ang ubang key players sa Webmasters kay gawas kang Fajardo, ang ubang mi-iskor wala makaabot og nuybe puntos.

Sa milabay'ng duha ka duwa, kanunay gyud naglabaw ang Webmasters, apan niadtong Game-3 sa miaging adlaw, ang Lancers maoy kanunay naglabaw gikan sa init nga pagsugod ug init sab nga pagtapos aron mo-iskor og 14 puntos nga kadaugan.

Puntos Matag Usa

UV (81) - Slaughter 22, Dennison 17, Calo 15, Cincoflores 10, Diputado 9, Olivares 5, Lao 2, Manigque 1

UC (67) - Fajardo 24, Rogado 8, Juliane 8, Bernil 8, Abella 7, Quilantang 5, Tano 3, Cayanong 2, Mohamad 2. – BANAT NEWS