Ala mi-KO ni Ratchu sa Paboksing sa Barangay

CEBU, Philippines - Usa ka makusog nga kinumo ang gibuhian ni Alil Ala sa Cebu City Sports Center (CCSC) stable nga maoy mipatikangkang ni Jimwell Ratchu sa gipahigayong Cebu City Amateur Developmental Tournament nga giulohan og “Paboksing sa Barangay 2009” niadtong miaging gabii diha sa Brgy. Apas Gym, ning siyudad.

Subling mipakita sa iyang katakus si Ala dihang gilumsan niya sa iyang kinumo si Ratchu sa Carcar Stable sa ilang sangka sa 42 kgs. division.

Mao kini ang ikaduhang daog ni Ala human sab niya gipilde si Marvin Alfante pinaagi sa referee stop the fight sa round 2 niadtong miaging semana diha sa Guadalupe.

Gawas ni Ala, laing boksingero sa CCSC nga sila si Fran Boyose ug Sano Ala ang mikulit sab og daog. Si Boyose mipukan batok ni Jose Velez sa 25 kgs. class, samtang si Ala mibuntog ni Johnrey Patalinghug sa Carcar sa 47 kgs.division.

Namawi hinuon ang Carcar stable dihang midaog si Nale Velez sa iyang away   batok ni Danlou Codilla sa Pit-os sa 48 kgs. division,

Mokompleto sa talaan sa mga mananaog mao sila si Marvin Magos sa Rex 'Wakee' Salud (RWS) stable, Jonas Sultan ug Jomarie Yuson sa 50 kgs. division, Jalil Payao sa 51 kgs., Zorro Babel sa 54 kgs., Christian Saga ug Romeo Urpaner sa 55 kgs. ug Marlon Torreon sa 60 kgs. division.

Ang maong torneyo gipasiugdahan sa Cebu City Sports Commission uban sa suporta sa Cebu City Government. – BANAT NEWS