Tallo mo-apelar og usab ni Tiukinhoy

CEBU, Philippines - Ang team consultant sa Cebu Institute of Technology (CIT) Wildkittens nga si Mark Anthony Tallo nagkanayon nga “unfair” ug dili makiangayon ang hukom sa Cebu Schools Athletic Foundation, Inc. (CESAFI) technical committee ubos ni by commissioner Felix O. Tiukinhoy, Jr. sa pagbasura sa ilang apelar nga dili pahamtangan og bug-at nga silot ang tulo nila ka players nga gisuspenso sa nahibiling duwa sa season atol sa nahitabong kagubot sa Game 1 sa best-of-five finals sa secondary division batok sa University of San Jose Recoletos (USJR) Baby Jaguars kaniadotng Huwebes didto sa Cebu Coliseum.

Si Tallo mipasangil kang Arlister Escatron sa Baby Jaguars nga maoy nagpasiugda sa kagubot dihang miduol kini sa iyang anak nga si Mark Jayven Tallo ug mihulga pinaagi sa pagtudlo-tudlo niini ug dayon mibangga kaniya sa dughan o chest bump.

Dad-on karong buntaga ni Tallo ang iyang anak aron maoy motug-an kang Tiukinhoy sa tanang panghitabo sa ilang pagbisita sa opisina sa commissioner sa dili pa ang Game 2 karong hapon.

Dihang gibangg-an ni Escatron si Tallo, daling midagan sa sulod sa korte sila si Joseph Nalos ug laing duha ka kauban nga mao sila si John Merlow Gera ug Carlo Jay Figuracion aron unta pagsanta ni Escatron.

Matud pa ni Tallo nga dili siya matagbaw sa hukom sa CESAFI secretaritat kung dili sab silotan si Escatron sama sa ilang gipahamtang ngadto sa iyang kauban nga si Venjie Trozo nga maoy tinubdan sa tanang kagubot human iyang gisiko si Franklyn Batiquin kinsa nahagsa didto sa salog.

Gikuwestiyon sab sa kampo sa Wildkittens nganong wala malakip pagsilot si Gudeve Edu Autentico kinsa gitawagan ug technical foul niadtong higayona.

Laing motug-an sa mga panghitabo mao si John Francis Abad sa Wildkittens kinsa mipasanigl sa usa sa sakop sa Baby Jaguars’ coaching staff nga si Randy Pogoy nga misukmag sa ubos nga bahin sa iyang likod o sa pelvic area.

Gustong pruybahon ni Tallo nga si Escatron maoy nakapa-init sa duwa tungod sa iyang pagduol sa iyang anak nga si Jayven ug laing sugilanon ang itug-an ni Abad ngadto kang Tiukinhoy aron mahusay gyud og maayo ang maong kaso. – BANAT NEWS