Lancers 2-0 ang tuyo

CEBU, Philippines - Tinguha karon sa 6-11 nga higanteng si Gregory Slaughter ug mga kauban sa University of the Visayas (UV) Green Lancers nga usban ang University of Cebu (UC) Webmasters ni 6-9 June Mar Fajardo aron mokuha’g 2-0 nga abante atol sa Game 2 sa ilang best-of-five series sa nagpadayong Cebu Schools Athletic Foundation, Inc. (CESAFI) finals sa didto Cebu Coliseum. Wala man tuod kahuygo og maayo si Slaughter dihang midaog sila sa Game 1, 64-56 bisan pa sa iyang nahipos nga 16 points apan gisalbar sila nilang Phil Mercader ug Ritchum Dennison kinsa maoy nakapasulod sa mga krusyal nga tirada.

Human sila mabiya-i ug 10 puntos sa fourth period, 38-48 kalit mihimo’g pungtanon nga rally ang Lancers aron pagsakmit sa labaw ug wala na nila hatagi’g higayon nga makabangon ug usab ang Webmasters ginamit ang makabungog nga 23-4 run.

Sukwahi kini sa nahimo ni June Mar Fajardo kinsa mihipos ug 21 puntos apan wala makakita og timbang aron mo-abag kanila sa ilang kampanya tungod kay tataw nga dili makahimo si Fajardo pagbaswat sa iyang team nga siya rang usa.

Napugngan sa Lancers sila si Moncrief Rogado ug Janssen Abella kinsa wala mag-igo sa gawas hangtod kalit lang nahagsa ang Webmasters daw kamada sa domino ug wala magamit ang tinagoan nga outside shooting sa ilang mga batos.

Sila si Slaughter, Mercader ug Dennison pulos mihakot og double figures sa Game 1 bisan pa sa luyahon nilang pagsugod ug ang mga second stringers sa Webmasters nakapugong sab sa labaw gikan sa first period hangtod na sa sayong bahin sa fourth quarter.

Apan dihang nakasikit na ang Lancers ug nakakuha sa labaw, wala na makasukli ang Webmasters sa kataposang kuatro minutos sa duwa ug na-igo sa huwaw ang Webmasters.

Si Fajardo lang ang naka-iskor og double figures ug kung padayon nga dili magpakita sa ilang katakos sila si Abella ug Rogado, dili sab katingad-an kung nganong makakuha’g 2-0 nga abante ang Lancers. Wala magkuwang ang depensa sa Webmasters ilabi na sa tulo ka kwarter apan ang ilang pagkolapso sa opensa maoy wala nila damha.

Gikatakdang mohimo og gamay nga adjustment karon ang Webmasters sa ilang dakong tinguha sa pagtabla sa serye sa 1-1. Sa laing bahin, suwayan sab sa Cebu Institute of Technology (CIT) Wildkittens pagkuha og 2-0 nga abante sa ilang kaugalingon nga best-of-five series batok sa University of San Jose Recoletos (USJR) Baby Jaguars sa secondary division.

Sa preliminary, magtiwas karon ang USJR Jaguars ug ang USC Warriors sa ilang rubbermatch diin ang modaog maoy mosakmit sa ikatulong pwesto sa collegiate division ug una nang nasakmit sa UC Junior Webmasters ang ikatulong pwesto sa high school division human sa ilang 2-0 sweep batok sa UV Baby Lancers. – BANAT NEWS