Altas Perps kampeon uli

MANILA, Philippines - Makaraang maagawan ng titulo, taas noong binawi ng University of Perpetual Help System Dalta ang tropeo ng NCAA cheerleading Competition sa pamamagitan ng matitikas na galaw at organisadong stunts.

Punum-puno ng enerhiya, humataw ang Altas Perps Squad para makaipon ng 335.5 points upang muling pagharian ang nasabing patimpalak.

Habang sumunod rin ang nagtatanggol na Heavy Bombers Pep squad na nag-uwi ng P55,000 nang maluklok sa ikalawang pwesto na pumoste ng 311points.

Bagamat guest team, nagpakitang gilas ang Emilio Aguinaldo na humanay sa mga nagwagi at lumikom ng 244 points para sa ikatlong pwesto na mag-angkin ng P45,000 premyo.

 “Naiyak ako dahil sa first time na-perfect yung execution ng mga pyramid at tosses namin. Yung pagkatalo namin last year, doon kami nag-motivate to do better para makabalik sa Top 3,” wika ni Perpetual Help coach Ruf Vandolph Rosario.

Pursigidong muling maisuot ang korona, pinagtuunan ng pansin ng Altas Perps Squads ang lahat ng detalye ng sayaw at tinutukan ang dalawang buwang paghahanda para maging perpekto ang lahat ng routines at stunts ng tropa. (SNFrancisco)