USC nidominar sa 3rd Mayor's Cup Swimfest
CEBU, Philippines - Ang University of San Carlos (USC) swimmers maoy nidominar sa bag-o lang natapos nga 3rd Mayor's Cup Age-Group Swim Meet niadtong miaging adlaw didto sa Tourist Seaside Hotel sa Barangay Poblacion sa Talisay City.
Ang USC mikutlo og siyam sa 20 ka titulo ubos sa paggiya nila ni Cynthjune Goden ug Ara Denise Echavez sa 13-14 year-old 100m breaststroke. Si Goden mitapos sa oras nga 1:20.82, samtang si Echavez mi-oras og 1:39.26.
Nanghawod usab ang USC sa 100m butterly human midaog sila si Ray Lister Tungala ug Bianca Marie Diaz, samtang sila si Jebb Lynus Cane ug Rozelle Marie Diaz ang nangharos sa 15-over sa 200m individual medley.
Gisakmit usab ni Goden ang ikaduha niyang bulawang medalya sa 13-14 year-old 200m individual medley. Ang USC naghari usab sa 12-under boys 200m free relay ug sa 13-17 boys 200m free relay.
Nagsunod sa USC mao ang University of Bohol (UB) nga midaog sa unom ka kategoriya sa pagpangulo nila ni Leonard Valmont ug Adonis Onez nga misakmit sa titulo sa 50m freestyle 15-over boys category, samtang si Kim Arthur Labasan ug Nathalie Deanne Fredensborg maoy naghari sa 8-under boys and girls categories.
Si Fredensborg mihakot usab og laing duha ka bulawan kortesiya sa 8-under girls sa 100m individual medley ug 50m backstroke. Ang katimbang ni Fredensborg nga si Jason Ginn Lopena mao usab ang nikampiyon sa 8-under boy’s 100 individual medley.
Mikompleto sa mga mananaog mao si Raina Fernandez sa Dumanjug District Swim Team nga misakmit og titulo sa 8-under, 50m butterfly, samtang ang University of San Jose-Recoletos (USJ-R) mao ang midaog sa 12-under 200m medley relay.
Duha usab ka kampiyonato ang nadaog sa Talisay City Swim Team gikan sa 12-under girls medley relay ug girls 200m free relay.
Ang maong torneyo gipasiugdahan sa Talisay City Sports Commission (TCSC) ug sa Visayas Integrated Schools Swim Association (VISSA). – BANAT NEWS
- Latest
- Trending
