COMFA, Myra's Videoke miabante sa semis sa MIBA caging

CEBU, Philippines - Miabante sa semifinals ang COMFA General Merchandise ni team owner Ely Gomoz human nila gipilde ang Islanders, 61-58 sa nagpadayong Mactan Island Basketball Association (MIBA) basketball tournament niadtong Domingo diha sa Pusok gym sa dakbayan sa Lapu-Lapu.

Grabe kaayo ang kumbati sa duha ka kampo diin ang matag habig mipatuman og hugot nga depensa ug init nga opensa nga nakapakulba sa tibuok duwa.

Misamot kakulbahinam ang duwa dihang nagtabla ang iskor, 58-all sa nahabiling 12 segundos sa final period.

Nakaginhawa og lawom ang COMFA human si Junjun Tesaluna, kinsa gi-foul ni Ruben Dignos mipasulod sa iyang duha ka free throws nga naghatag sa iyang koponan og dos puntos nga bentaha, 60-58.

May purohan unta nga makatabla ang Islanders dihang ila ang ball possession, apan si Ernie Giganto abtik nga miilog sa bola ug nakakubit pa kini og foul nga mihatod kaniya ngadto sa free throw line. Ang usa sa duha ka free throw nga napasulod ni Giganto maoy mikandado sa kadaugan.

Si Celso Igot milansang og 13 puntos aron pangulohan ang COMFA, gisundan ni Tesaluna nga miabuno og 11 puntos. Sila si Ely Gomoz, Giganto ug Ram Gomez mipupo og otso puntos matag usa alang sa maong kadaugan.

Ang pilderong Islanders gipangulohan sab ni Buldog Ybañez nga miburak og 12 puntos, samtang si Waway Cuizon miamot og 11 puntos.

Sa laing aksiyon, ang Myra's Videoke nakaangkon sab og luna sa semifinals human maka-eskapo sa laing kulbahinam nga duwa batok sa Gym Supplement, 89-88.

Naglawig na unta sa kadaugan ang Gym Supplement human kini milabaw og 12 puntos sa nahabiling 1:40   sa duwa, apan si coach Jojo Aligado sa Myra's Videoke alistong mipatawag og time-out ug gipasulod niya ang iyang mga alas nga sila si Lito dela Peña, Anthony MIano, Olan Velasquez, Isok Malinao ug Bitoy Allecer aron gub-on ang duwa sa Gym Supplement gamit ang trapping defense nga maoy gihimo nilang hagdanan pagkab-ot sa kadaugan.

Ang maong torneyo gipaluyohan ni Lapu-Lapu City Mayor Arturo Radaza, Mactan Brgy. Capt. Paz Radaza ug Pusok Brgy. Councilor Jun Gomez.

Si Harry Radaza maoy commissioner, samtang si kanhiPBA player Larry Villanil maoy board of director.

Puntos Matag Usa

Unang duwa:

MYRA'S VIDEOKE (89) - Velasquez 25, Bataluna 22, Dela Peña 10, Miano 10, Malinao 8, Berezo 4, Guevarra 2, Berame 2, Gomoz 1

GYM SUPPLEMENT (88) - Bensi 22, Intong 12, Patalinghug 7, Llenes 6, Orat 4, Tampus 4, Amodia 3, Booc 2, Potot 2, Sayson 2

Ikaduhang duwa:

COMFA (61) - Igot 13, Tesaluna 11, Gomoz 8, Giganto 8, Gomez 8, Dorig 7, Marbella 7, Seno 6, Aquino 5, Adlit 3, Carpentero 2, Simbajon 2

ISLANDERS (58) - Ybañez 12, Cuizon 11, Portugaliza 8, Dignos 5, Edgar Ymbong 4, Ernesto Ymbong 4, Castueras 3, Celiz 2, Cosep 2, Lamoste 2, Butaya 2, Augosto 2, Bontes 2. – BANAT NEWS