CEBU, Philippines - Gipakgang sa University of Cebu (UC) Webmasters ang mainitong rally sa University of the Visayas (UV) Baby Lancers sa second half aron pagposte og 95-82 nga kadaugan sa Game-1 sa ilang "best-of-three" series alang sa ikatulo nga dapit sa secondary division sa 9th Cebu Schools Athletic Foundation Inc. (CESAFI) basketball event kagabii diha sa Cebu Coliseum.
Ang Junior Webmasters milansang og 21 puntos nga labaw sa halftime sa iskor nga 60-39, apan ang Baby Lancers mikalingaw og kitkit sa labaw ug niabot na lang og 11 puntos, 49-60, sa nahibiling 7:40 sa third period.
Ang sentrong si Alvin Labolabo Jr. mipukaw sa nahinanok nga Junior Webmasters pinaagi sa pagpasulod og duha ka free throws nga maoy pabilo sa ilang 11-0 nga bomba aron pagposte og 70-49 nga bentaha. Wala na sila molingi pa sukad niadto.
Ang tandem nilang Gerald Ampoon ug Alfred Codilla mao ang nangulo sa atake sa UC. Si Ampoon mikabkab og 19 puntos, samtang si Codilla miposa og 18 puntos, samtang sila si Jerei Marion Pingoy ug Labolabo miabuno og 10 puntos matag usa.
Sa maong kadaugan, ang Junior Webmasters kinahanglan modaog pag-usab sa Game-2 ugma aron hingpit nilang maangkon ang ikatulong dapit.
Si Gerald Legarde maoy topscorer sa Baby Lancers pinaagi sa iyang 23 puntos, gisundan sa beteranong pointguard nga si Glennson Ybañez ug Jasper San Brigoli nga mitampo og 15 puntos matag usa.
Puntos Matag Usa
UC (95) - Ampoon 19, Codilla 18, Pingoy 10, Labolabo 10, Aranas 9, Nazareno 8, Talisic 7, Pua 5, Saramosing 4, Comendador 3, Padilla 2
UV (82) - Legarde 23, Ybañez 15, Brigoli 15, Mendoza 6, Suan 4, Linao 4, Arong 4, Smith 4, Pangan 3, Navaja 2, Calvo 2. – BANAT NEWS