Pajo, USPF nag-una sa liderato

CEBU, Philippines - Gihawanan og maayo sa Pajo National High School ang dalan nila aron madepensahan ang ilang korona human mikulit og tulo ka sunod-sunod nga daog sa 6th Shakey's Girls V-League Visayas regional elimination niadtong miaging adlaw diha sa Lapu-Lapu City Sports Complex.

Ang Pajo ni coach Fr. Rolando Manayon mikastigo sa SouthCrest, 25-10, 25-7 luyo sa nagpungasi nga atake nilang Athena Sucalit ug Catherin Marquez.

Nasundan ang daog sa Pajo human nila gipilde ang Mandaue City Comprehensive National High School (MCCNHS), 25-18, 25-16.

Sa laing duwa, ang University of Southern Philippines Foundation (USPF) nakig-uban sab sa Pajo sa liderato human sab kini mihipos og 3-0 nga rekord.

Ang USPF ni coach Jordan Paca mipaluhod sa Colegio de la Immaculada Concepcion (CIC)-Mandaue, 25-12, 25-11 ug nidaog sab kini pinaagi sa default batok sa St. Theresa's College (STC).

Sa lain pang mga aksiyon, ang Abellana National School (ANS) mirehistro sa ilang ikaduhang sunod-sunod nga daog batok sa San Isidro Parish School, 25-7, 25-11, samtang ang University of San Jose-Recoletos (USJ-R) midagit og duha ka daog batok sa St. Louis School-Mandaue, 25-16, 25-23 ug sa SouthCrest, 25-13, 25-19.

Ang Don Gerardo Memorial National High School nakabangon gikan sa ilang kapildihan ngadto sa Pajo atol sa opening day dihang ilang gipahimungtan ang MCCNHS, 25-16, 25-14 ug ang St. Louis, 25-16, 25-15.    (BANATNEWS)