CEBU, Philippines - Usa ka dakung upset ang nahitabo kagahapon dihang gi-usban sa fourth-seed University of San Jose-Recoletos (USJ-R) Baby Jaguars ang no. 1 defending champion University of Cebu (UC) Junior Webmasters, 80-74 sa Game-2 sa ilang "best-of-three" semifinal series aron pag-abante sa finals sa 9th Cebu Schools Athletic Foundation, Inc. (CESAFI) basketball event kagahapon diha sa Cebu Coliseum.
Apan maghuwat pa ang Baby Jaguars sa ilang ikasangka sa finals tungod kay nalugwayan pa ang kinabuhi sa 3rd seed Cebu Institute of Technology (CIT) Wildkittens human makatabla dihang ilang gipukan ang no. 2 nga University of the Visayas (UV) Baby Lancers sa iskor nga 73-65.
Ang tinaktakay nga duwa tali sa Wildkittens ug Baby Lancers himuon karong alas-4 sa hapon.
Sakit nga kapildihan ang naangkon sa Junior Webmasters tungod kay ilang giharos ang elimination round, 8-0 lakip na niini ang 101-93 nga kadaugan batok sa Baby Jaguars.
Makapakurat nga pito ka three-point shots ang gibuhian sa ilang rookie point guard nga si Arlister Escatron uban ang usa ka three-point play aron paghipos og kinatibuk-ang 26 puntos alang sa Baby Jaguars, samtang nagmangtas pud si Clint Muñez, kinsa mibahog og 23 puntos.
Napugngan sa Baby Jaguars ni coach Marlon Piodo ang beteranong si Alfred Codilla sa UC ngadto sa kuwatro puntos ug ingon man ang higanteng sentro nga si Alvin Labolabo Jr., kinsa ila lang gipa-iskor og siyete puntos.
Si Gerald Ampoon maoy nangulo sa nadisgrasyang Junior Webmasters pinaagi sa iyang 21 puntos.
Nag-ayo na unta ang duwa ni Jerei Marion Pingoy, apan igo lang siya nakakuha'g dos puntos sa fourth period sa iyang 18 puntos.
Sama sa Game-1, nag-una sab ang UC sa halftime sa iskor 45-34, apan nasakmit sa Baby Jaguars ang labaw pagsugod sa fourth period, 62-58.
Sa laing bahin, ang abtik ug dangog nga pointguard nga si Mark Jayven Tallo mao lang ang bugtong player nga nakakuha og double figures aron pangulohan ang Wildkittens pinaagi sa iyang 32 puntos.
Ang nabuntog nga Baby Lancers gipangulohan sab ni Gerald Legarde nga mitusak og 24 puntos.
PUNTOS MATAG USA
Unang duwa:
USJ-R (80) - Escatron 26, Muñez 23, Autentico 10, Trozo 8, Go 5, Montecillo 4, Alob 3
UC (74) - Ampoon 21, Pingoy 18, Talisic 12, Labolabo 7, Aranas 6, Codilla 4
Ikaduhang duwa:
CIT (73) - Tallo 32, Batiquin 9, Nalos 7, Limalima 7, Pamaong 6, Sanchez 5, Koino 4, Abad 2
UV (65) - Legarde 24, Ybañez 8, Marata 8, Pero 8, Linao 7, Arong 3, Smith 1 (BANATNEWS)