UC, USJ-R hawod sa CESAFI karatedo event

CEBU, Philippines - Ang University of Cebu (UC) ug ang University of San Jose-Recoletos (USJ-R) maoy labing daghang nakabkab og mga medalya sa duha ka managlahing dibisyon aron paghari sa karatedo event sa 2009 Cebu Schools Athletic Foundation Inc. (CESAFI)   diha sa USJ-R-Basak campus gym, ning siyudad.

Nanghawod ang UC sa tertiary level human mihakot og lima ka golds, lima ka silvers ug usa ka bronze.

Si Ana Marie dela Riarte maoy nangulo sa UC nga mikutlo og duha ka bulawang medalya batok sa iyang teammate nga si Jazziel Seguerra sa kata competition ug sa pambato sa University of the Visayas (UV) nga si Merlyn Alin sa 48 kgs. class.

Namawi hinuon si Seguerra sa 53 kgs. sa kumite category dihang iyang gilabni ang bulawan batok ni Anafe Ubas sa UV.

Laing mitunol og bulawan sa UC mao si Kim Legarto sa men's kata ug Samuel Orillo sa 55 kgs. class.

Sikit nga misunod sa overall standing mao ang UV sa ilang tulo ka golds, upat ka silvers ug duha ka bronzes.

Mihakot og bulawan mao sila si George Egan Arcilles ug John Rey Abasolo sa 65 kgs. ug si Richard Claros sa 70 kgs.

Mi-okupar sa ikatulo ang USJ-R uban ang duha ka golds ug unom ka bronzes kortesiya nilang April Marie Campo sa 60 kgs. ug Mel Kassan Anchuvas sa 70 kgs., samtang ang University of Southern Philippines Foundation (USPF) nalandig sa ikaupat sa ilang usa ka gold ug ang mikapyot sa ikalima ang University of San Carlos (USC) nga adunay usa ka silver.

Sa laing bahin, ang USJ-R mao sab ang naghari sa secondary division human mikabkab og tulo ka gold medal. Ang gold medalists sa USJ-R naglakip nila ni Tracy Basalo sa 13-14 class, Christian Mejor sa girl’s 15-16 division ug Mark Joseph Yanson sa boy’s 15-16 class.

Si Sydney Rey Metante sa USPF mituhog og duha ka golds gikan sa kata ug kumite 13-14, samtang si Korina Enclona mihatag og gold medal sa USC sa kata event. – BANAT NEWS