1st Barangay Ibabao-Estancia Council & SK Cup pormal nang gibuksan

CEBU, Philippines - Pagkaplag og bag-ong talento maoy tuyo ug tumong sa pagkahimugso sa 1st Barangay Ibabao Estancia Council and SK Cup basketball tournament nga gibuksan niadtong Domingo diha sa Barangay Community Ground sa dakbayan sa Mandaue.

Mao kini ang mensahe ni Ibabao-Estancia Brgy. Captain Carmelino 'Jun' Del Mar Jr. ngadto sa mga atleta.

Sa pakighinabi sa Banat News, si Del Mar, kinsa mao usab ang overall chairman sa liga nagkanayon nga laraw sa maong torneyo mao ang paghashas sa ilang mga kabatan-onan kun kinsa ang adunay potensiyal sa natad sa basketbol. Gihimong ehemplo ni Del Mar mao ang mga magduduwa sa Cebu-Mandaue Landmasters sa Liga Pilipinas.

Ang maong torneyo nga gibahin sa tulo ka kategoriya -- midget, seniors ug 40-above, gisalmotan sa Sitio Macopa, Sitio Pao, Sitio Papaya, Sitio Papaya-Manga, Sitio Bayabas-Ternate, Sitio Tambis, Sitio Nangka-Sambag, Sitio Lemon ug Sitio Lum-Chi-Cai.

Sa iyang bahin, si Banilad Brgy. Captain ug kanhi Mandaue City Counilor Glenn Bercede mitug-an nga gihimo ang maong kompetisyon dili lang sa pagbaid sa abilidad sa mga kabatan-onan, kun dili lakip na ang paghiusa ug pagtudlo sa magduduwa og sportsmanship.

Dugang pa niya nga natawo ang maong kalihukan tungod sa kinasingkasing nga suporta ni Mandaue City Mayor Jonas Cortes.   (BANATNEWS)