Unit 5 kampiyon sa 19th Cebu City Olympics

CEBU, Philippines - Gipalagpot sa Unit 5 ang Unit 9 alang sa titulo sa secondary division, samtang ang Unit 4 mao ang kampiyon sa elementary division sa 19th Cebu City Olympics niadtong Domingo diha sa Cebu City Sports Center.

Gidaklarar na usab ang University of Cebu nga overall champion sa tertiary division human sila mikubkob og 30 ka gold, 34 ka silver ug 16 ka bronze medals. Ang UC mitapos sa ilang kampanya pinaagi sa usa ka impresibong kadaugan batok sa University of San Jose-Recoletos (USJ-R) sa men’s basketball.

Sa 11 ka teams nga misalmot sa secondary level, ang Unit 5 maoy mipatigbabaw sa dihang mirehistro sila og 281 puntos aron langkaton ang kampiyonato gikan sa Unit 9 nga adunay 243.95 puntos. 

Ang Unit 5 maoy nanghawod sa boy's ug girl's division sa athletics, chess, table tennis, badminton, dancesport, arnis, swimming girl's division ug sa taekwondo boy's division, samtang ang Unit 9 nga mipahiluna sa ikaduhang dapit mao ang naghari sa baseball, sepak takraw, softball ug girls gymnastics. Ang Unit 1 maoy mitungtong sa ikatulong dapit.

Sa ilang bahin, ang over-all champion Unit 4 nga adunay 285.5 puntos uban sa Unit 6 (194.5) ug Unit 1 (172.5) maoy top-three teams sa elementary division.

Sa collegiate division, ang migawas nga kampiyon ang UC, gisundan sa Southwestern University (SWU), University of San Carlos (USC), Cebu Normal University (CNU), USJ-R ug University of the Visayas (UV).    (BANATNEWS)