West daog batok East, 100-95

CEBU, Philippines - Naka-ipsot ang West All-Star ni coach Reggie Licanda batok sa East All-Star sa beteranong coach nga si Delfin Pepito Jr. pinaagi sa pag-iskor ug 100-95 nga kadaogan kagahapon sa high school division atol sa pagpahigayon sa tinuig nga Cebu Schools Athletic Foundation, inc. (CESAFI) All Star Games didto sa Cebu Coliseum.

Ning pagsuwat, padayon pang nagtigi sa ilang abilidad ang mga pambato sa three-point shootout ug sa slam dunk contest. Ang panapos nga kalinagawan mao ang East vs. West sa collegiate division diin magbagat na usab sila si Gregroy Slaughter sa University of the Visayas ug si June ar Fajardo sa University of Cebu.

Gipaila sa mga batos ni Licanda sa UC Junior Webmasters nganong sila maoy gika-intapang team karon sa juniors division tungod kay sila si Gerlad Ampoon, Jerei Marion ingoy ug Alfred Codilla maoy nahimong yawe sa kadaogan.

Si Ampoon kinsa maoy nagu sa West human siya moburak ug 21 puntos, mao sab ang nangu sa Mythical Five uban kang Pingoy, Gerald Legarde, Joshua Corcilles ug Mark Jayven Tallo.

Ang East ni coach Pepito maoy kanunay naglabaw ug naghupot silag singkon puntos nga abante sa halftime, 50-45 gikan sa otso puntos sa first period, 29-21 apan misikit ang West sa third period hangtod naka-apas gyud sila didto na sa kataposang kwarter.

Diriyot unta mahulog sa standoff ang duwa tungod kay ig na lang naglabaw ang West ug dos puntos, 97-95 sa daginotong oras apan ang free throws nila ni Pingoy ug Ampoon maoy nageslyado sa ilang kadaogan.

Misipyat si Pingoy sa usa niya ka free throw apan ang West naghupot nag 98-95 nga labaw sa kataposang 9.3 segundos human sa foul ni Anthony Pero sa East ug wala sab madugay, ang duha ka free throws ni Ampoon maoy naghatag sa 100-95 nga kadaogan human sa foul ni Francisco Arong sa East may 1.5 segundos ang nahibilin.

Ang madaogon nga West team kinsa nakadawat ug P/5 mil pesos gikan sa sponsor Grosby, nakadawat sab ug medalya ug mga trophies alang sa Mythical Five samtang ang East mipauli dala ang P/4 mil pesos apan nakadawat sab silang tanan ug medalya.

Parehong mi-iskor ug 11 puntos sial si Pingoy ug Codilla alang sa West uban kang Jerry Jan albert Seno sa Sacred Heart School-Jesuits (SHS-J) Eaglets.

Si Legarde ug Corcilles sa USPF Baby Panthers parehong mihipos ug 16 puntos aron pangulohan ang East samtang si Tallo ug Arong may 13 ug 12 puntos matag usa.

Puntos matag usa:

West (100)—Ampoon 21, Codilla 11, Pingoy 11, Seno 11, Nazareno 7, Bacaltos 6, Autentico 6, Muñez 6, Lalolabo 5, Trozo 5, Muller 4, Porter 3, J. Ruiz 3, Branzuela 2

East (95)— Legarde 16, Corcilles 16, Tallo 13, Arong 12, Batiquin 9, ero 9, Linao 5, Nalos 4, Diapera 3, Palapar 2, Ybañez 2, Limalima 2, Marata 1, Romaguera 1 Halftime: 50-45. -  BANAT NEWS