CEBU, Philippines - Mobanat na ang Mandaue Leg sa Liga Pilipinas 3rd Conference karong Miyerkules diha sa Mandaue City Sports Complex.
Mopakita na sa ilang katakus ang host team nga Mandaue City Landmasters kinsa lab-as pa sa ilang nindot nga performance batok sa mga PBA team nga Barangay Ginebra Kings ug Coca Cola Tigers.
Ang laing tulo ka team nga magtigi uban sa Landmasters alang sa kampiyonato sa Mandaue Leg mao ang Forward Taguig, Quezon Oilers ug Zamboanga Uno Latinos. Ang upat ka koponan mag-ilog usab sa luna sa quarterfinals sa upat ka adlaw nila nga kumbati.
Ang Forward Taguig makigharung sa Zamboanga Latinos sa opening game karong Miyerkules, samtang ang Landmasters musuway pagpukan sa Quezon sa second game.
Sa Oktubre 15, ang Taguig ug Quezon na usab ang magsangka, samtang ang Landmasters mao na usab ang musukod sa abilidad Zamboanga. Subling mopakita og aksiyon ang Zamboanga batok sa Quezon sa Oktubre 16 ug ang Mandaue ug Taguig maoy magpinaksitay sa second game.
Ang mugawas nga ranked 1 ug ranked 2 mao ang magsangka sa Mandaue leg championship, samtang ang number 3 ug 4 mao usab ang mag-ilog sa 3rd place karong Sabado. - Lemuel P. Maglinte (BANAT NEWS)