1st Congressman Eduardo Gullas Fun Run mosikad karon

CEBU, Philippines - Lain na sab nga lumba sa dagan ang gikatakda uban ang liboan ka runners sa pagsikad sa 1st Congressman Eduardo Gullas Fun Run karong alas-6 sa buntag diha sa Talisay City Hall.

Ang lumba nga usa sa mga kalihukan sa kapistahan sa ilang mahal nga patron Sta. Teresa de Avila adunay upat ka kategoriya -- 1K (Seniors Citizen), 3K (Inter-School, LGU ug Media), 5K (Open) ug 10K (Open).

Subli na sab nga mag-abot ang mga top Cebuano runners nga sila si Mendel Lopez, Madelyn Carter ug managsuong Joel ug Eugene Delposo batok sa mga Mindanao runners nga sila si Elmer Bartolo ug Pink Oktober Run 10K champion   Mary Grace Delos Santos.

Adunay special awards nga madawat sa modaog sa   youngest runner (Talisaynon ug non-Talisaynon), oldest runner (Talisaynon ug non-Talisaynon), best in costume, biggest delegation ug “pinaka” award. 

Gawas sa 10K Open, may lumba sab alang sa mga sakop sa Tri-Media nga pangulohan sa 1st Press Freedom Run champion ug ABS-CBN TV Patrol news anchor Atty. Haide Acuña.

Gikatakda sab nga modagan ang mga opisyales ug mga kawani sa unang distrito sa lalawigan Sugbu nga naglakip sa Minglanilla, Naga, Carcar ug Sibonga. 

Sa laing bahin, gipahibalo ni Talisay City Councilor Rudy Cabigas nga adunay bus nga mokuha sa Cebu City runners sa alas-5 sa buntag diha sa Cebu City Sports Center.

Ang maong lumba gipasiugdahan sa Talisay City Sports Commission ug Kabangis Runners Club sa Talisay uban sa suporta ni Sen. Francis 'Chiz' Escudero, Smart Communication, Nature’s Spring, Cebu Sizzlers Chicken Roast, Atan Guardo, Golden Oats ug Vicky Marketing.   (BANATNEWS)