"Volleyball Cares for Sir Eugene" gitakda

CEBU, Philippines - Ang University of San Carlos (USC) volleyball varsity players ug alumni mopasiugda og exhibition games nga ulohan og 'Volleyball Cares for Sir Eugene' karong Oktubre 17 sa alas-9 sa buntag diha sa USC main gym.

Si Cebu Volleyball Association (CEVA) president ug kanhi USC team captain Glenn Soco maoy mangulo ning tinuyong kalihukan agi'g bawos ug tabang sa ilang kanhi coach ug Cebu Sports Hall of Famer nga si Eugene dela Cerna, kinsa anaa karon sa critical condition tungod sa kidney failure diha sa Visayas Community Medical Center (VCMC).

Matud pa ni Soco, nga ang 65-anyos nga si dela Cerna nahimo nilang ikaduhang amahan sa dihang sila iyang giamuma ug gialagad isip volleyball players.

Si dela Cerna, kinsa gituboy ngadto sa Cebu Sports Hall of Fame niadtong 2004, nakahipos sab og daghang kampiyonato dili lang dinhi sa Sugbu kun dili sa tibuok nasud.

Naila na sab siya kay nakalalang kini og mga kalibreng magduduwa sama sa kaluhang Jao -- Marilou ug Marichu (karon Ramirez ug San Juan) ug Maribel Rosiana nga pulos nasakop sa nasudnong koponan. – BANAT NEWS