Tipon, Suarez nagpakitang-gilas

BAGUIO CITY, Philippines – Pinabagsak nina World championships vete-rans Joan Tipon at Charly Suarez kahapon ang mga magkahiwalay na kalaban sa Amateur Boxing Association of the Philippines elimination tourney.

Matapos talunin ni Tipon, gold medalist sa 2006 Asian Games, si Aston Francis Palicte, 2-1, para ma-sweep ang three-man bantamweight division, at durugin ni Suarez si Jhergigs Chavez, 3-0, bumaba ang dalawang boxers at naghintay sa assessment ng mga mabibigat na hurado.

Kailangang makumbinsi nila sina American trainer Freddie Roach, Team Pacquiao assistant coach Buboy Fernandez, at Nonito Donaire Sr., tatay ni world super-flyweight champion Nonito Donaire Jr.

Nauna nang nanalo si Tipon kay Glicerio Catolico III sa simula ng three-leg elimination na magsisilbing tryouts para sa national squad sa 25th Southeast Asian Games sa December sa Laos.

Hindi napanood ni Roach ang mga laban dahil sa taping sa HBO’s 24/7 show ngunit nangako siyang hindi niya palalagpasin ang third at final leg bukas.

Sa women’s side ng competition, tinalo sa puntos ni Asian Indoor Games-bound Michelle Martinez, dating Asian champion, si Nesthy Peticio sa lightweight class, naungusan ni Josie Gabuco si Karen Jane Recaido sa flyweight level, at iginupo ni Mary Joy Cacal si Rose Ann Monares sa bantamweight category.

Pinaluhod ni Jimmy Vallares Jr. si Dennis Galvan sa referee stopped contest sa loob ng two minutes at 27 seconds sa second round ng light-welterweight clash, ang tanging laban na hindi tumagal.