Amazing Race season 2 mosikad karon

CEBU, Philippines - Mosikad na ang giatngan nga Amazing Race season 2 “The Campinsa Challenge” karong alas-2 sa hapon didto sa dakbayan sa Talisay.

Sa dili pa ang kompetisyon, adunay ipahigayon nga Santos nga Misa sa Sta. Teresa de Avila Parish ug isunod dayon ang motorkada.

Napulog pito (17) ka teams gikan sa 17 ka barangays sa siyudad sa Talisay ang mag-unhanay sa usa'g-usa pinaagi sa paglumba og sulbad sa ilang mga challenges. Ang matag koponan gilangkuban og duha ka miyembro nga lalaki ug usa ka babaye. 

Ganting salapi, tropeyo ug gift packs ang nagpaabot sa mga palarang mananaog.

 Ang kampiyon makadawat og P25,000, ang second placer mobulsa og P15,000, samtang ang third placer makaangkon og P10,000.

Ang Amazing race season 2 nga usa sa mga kalihukan sa umaabot nga kapistahan sa patron sa siyudad sa Talisay Sta. Teresa de Avila, gipasiugdahan ni Talisay City acting vice mayor Allan Bucao uban sa suporta sa Talisay City Government. – BANAT NEWS