Danao City mo-host sa CVIRAA

CEBU, Philippines - Nahingpit na gyud nga ang Danao City pinaagi ni mayor Ramon 'Nito' Durano III ug ni councilor Oscar 'Boying' Rodriguez Jr. maoy mo-host sa Central Visayas Regional Athletic Association (CVIRAA) Regional Meet nga gikatakda karong Nobiyembre 8-14.

Mao kini ang labing unang higayon sa kasaysayan sa CVIRAA nga duwa himuon sa bulan sa Nobiyembre. Sa naandan, himuon kini sa bulan sa Marso, usa ka bulan sa dili pa ang Palarong Pambansa.

Una sab kining higayon nga duha ka CVIRAA Meet ang nahitabo sud sa usa ka tuig.

Ikaduha sab kining higayon nga ang Danao City mo-host sa labing dakung regional multi-sporting event nga gipasiugdahan sa Department of Education (DepEd). Unang ni-host ang Danao niadtong 2004. – BANAT NEWS