Fatima kampiyon sa Saturday Club tilt

CEBU, Philippines - Gipaluhod sa Our Lady of Fatima ni team owner Yoli Meso ang H&C Sand and Gravel Dealers, 107-101 sa gubat sa walay pildeng mga koponan aron paglangkat sa korona sa Saturday Club 2009 First Conference Basketball Tournament diha sa Quiot Sports Complex.

Ang duha ka koponan miabante sa final round bitbit ang managsamang 13-0 win-loss records.

Unang miratsada ang H&C ug milansang kini og 37-16 nga abante ubos sa kombinasyon nilang Jackson Lapeña ug Fern Sumargo, apan ang Fatima sa giya nilang Glen Birao ug Michael Arias kalit lang nga mi-rally aron ilogon ang labaw sa halftime, 52-46.

Nakontrolar gihapon sa Fatima ang momentum paingon sa fourth period uban ang 79-69 ug wala na kini molingi pa ngadto sa naghangak nga H&C.

Si Arias, ang kanhi SWU Cobra maoy nangulo sa Fatima pinaagi sa iyang 30 puntos, samtang si Birao midugang og 23 puntos. Sila si Efren Mosqueda, Rey Jumamel ug skipper Charlie Reyes nagkumboya og 32 puntos.

Ang H&C gipangulohan ni Lapeña, kinsa miburak og 26 puntos, gisundan nilang   Sumargo ug Randy Ramas miabuno og 14 puntos matag usa.

PUNTOS MATAG USA

Fatima (107) - Arias 30, Birao 23, Mosqueda 12, Jumamel 10, Reyes 10, Canasa 7, Ortiz 6, Meso 4, Nacorda 3, Perez 2

H&C (101) - Lapeña 26, Sumargo 14, Ramas 14, Cabo 11, Nuñez 8, Piezas 7, Satorre 7, V. Cabuenas 6, Zapanta 4, L. Cabuenas 4    (BANATNEWS)