CEBU, Philippines - Walay kukaluoy nga gimasaker sa University of Cebu (UC) Webmasters ang Don Bosco Technology Center (DBTC) 118-70 aron pormal na nga mosulod sa semifinal round sa 9th Cebu Schools Athletic Foundation Inc. (CESAFI) basketball event kagabii diha sa Cebu Coliseum.
Gumikan niini, ang Webmasters moharong sa fourth-ranked University of San Carlos (USC) Warriors sa semifinals nga sugdan sunod Martes.
Si Moncrief Rogado, kinsa wala makaduwa atol sa ilang 74-77 nga kapildihan ngadto sa Greywolves sa Game-1 niadtong Septiyembre 29 tungod sa labad sa ulo, maoy nangulo sa maong kadaugan nga mipupo og 31 puntos.
Grabe sab kaayo nga nakapakita og labok ang 6-foot-9 center nga si June Mar Fajardo, kinsa mi-iskor og 24 puntos lakip na ang two-handed slam. Nagma binantayon na sab si Fajardo sa iyang foul ug ning higayona nakahimo lamang siya og duha ka fouls sa kinatibuk-ang duwa sukwahi sa ilang kapildihan diin siya na-fouled out.
Ang Webmasters milansang og 47 puntos, 108-61 sa nahabiling 4:33 sa duwa nga naghatag og kasiguroan sa ilang kadaugan.
Gumikan niini, gipagawas ni coach Roel Gomez ang iyang mga alas sa katapusang 2:31 sa duwa aron hatagan ang iyang second stringers og higayon nga makapakita sa ilang abilidad.
Nakatabang sab og daku si Janssen Abella diin miposa kini og 17 puntos, samtang ang back-up guard nga si Keith Cayanong miabuno og 10 puntos.
Ang Greywolves, kinsa niduwa nga wala ang ilang top gunner nga si Alain delos Santos, gipangulohan ni Jefford Aldave, kinsa miratsada og 21 puntos, 10 niini gikan sa first quarter, samtang si Celso Colegado Jr. midukdok og 19 puntos.
Ning pagsulat, ang third seed University of San Jose-Recoletos (USJ-R) Jaguars ug ang sixth-ranked Cebu Institute of Technology (CIT) Wildcats padayon pang nag-ilog alang sa katapusang lingkoranan sa semifinals.
PUNTOS MATAG USA
UC (118) - Rogado 31, Fajardo 24, Abella 17, Cayanong 10, Juliane 8, Gomez 8, Miranda 6, Bernil 5, Quilantang 2, Luceño 2, Cueva 2, Tano 2, Cabrera 1
DBTC (70) - Aldave 21, Colegado 19, Castro 8, Cabrilles 8, Cinco 5, Georsua 4, Juntilla 3, Hernando 2