Warriors sud semis

CEBU< Philippines - Gipamatud-an sa fourth-seed University of San Carlos (USC) Warriors nga dili tsamba ang ilang kadaugan batok sa fifth-seed Southwestern University (SWU) Cobras atol sa una nilang panagbagat, dihang mikulit na sab kini og laing daog, 80-72 aron moabante sa semifinal round sa 9th Cebu Schools Athletic Foundation Inc. (CESAFI) basketball event niadtong Domingo diha sa Cebu Coliseum.

Giusikan sa Warriors ang ilang 18 puntos nga labaw, 66-48, apan wala sila mataranta ug naka-eskapo bitbit ang otso puntos nga kadaugan.

Ang kugihan kaayong Cobras naka-iskor og 16-0 run aron pagsikit sa iskor, 72-74, apan mao na lang kadto ang katapusan nilang kabuga kay wala na sila tugoti sa Warriors nga maka-iskor og usab sa   katapusang 1:25 sa fourth period.

Si Chris Litorja, kansang buzzer-beating triple nakapadaog sa USC, 74-73 batok sa SWU sa una nilang panagsangka, mao gihapon ang nangulo sa Warriors pinaagi sa iyang 18 puntos, samtang si Joven Cid Cortes miamot og 15 puntos. Sila si Ryan Carlo Padayao ug Sam Jordan Hermosa nagkumboya og 25 puntos.

 Sila si Eliud Poligrates ug Eleazar Armecin mao sab ang nangulo sa pilderong Cobras nga mi-iskor og 16 puntos matag usa, gisundan ni Arrd Diango pinaagi sa iyang 11 puntos.

 Hingpit na nga naka-abante ang upat ka seeded teams sa high school human sab midaog ang CIT Wildkittens batok sa USC Baby Warriors sa iskor nga 88-67, samtang ang Baby Jaguars mipalagpot sa Sacred Heart School-Jesuits (SHS-J) Eagles,76-67.

Sa laing bahin, hinugtanay sa bakus ang masaksihan dihang upat ka teams ang mag-abot sa tinaktakay nga duwa diin ang mga mananaog maoy mokompleto sa semifinalists sa collegiate division.

Sa unang duwa nga gikatakda sa alas-5 sa hapon, ang top-seed University of Cebu (UC) Webmasters moharong sa Don Bosco Technology Center (DBTC) Greywolves, samtang ang second-ranked University of San Jose-Recoletos (USJ-R) Jaguars makigsangka sa Cebu Institute of Technology (CIT) Wildcats sa main game sa alas-6:30 sa gabii.

Tinguha karon sa Webmasters nga ilang palagputon sa hingpit ang no. 8 seed Don Bosco Technology Center (DBTC) Greywolves, kinsa nidaog, 77-74 atol sa ilang duwa niadtong    Septiyembre 29 diha sa USC gym. Ang Jaguars mikaging sab batok sa sixth-seed Cebu Institute of Technology (CIT) Wildcats pinaagi sa overtime niadtong Domingo, 85-91.

Ang leksiyon nga naani sa UC ug USJ-R mao nga dili sila angay mokompiyansa batok sa ilang kaatbang bisan og ubos kini sa seeding.

Ang Webmasters mosandig sa ilang numero unong hinagiban sa opensa nga si 6-foot-9 center June Mar Fajardo. Gilauman sab karon ang pagbalik ni Moncrief Rogado alang sa Webmasters ug ning higayona maalarma ang Greywolves kay aduna na man unya’y

timbang sila si Janssen Abella,

Arvin Kim Gomez ug Robinson Mohamad.

Ang Greywolves pangulohan nilang Celso Colegado, Jr. uban sa ilang top gunner Alain delos Santos ug mga sakop sa starting units nga naglakip nilang Joseph Villaver, Jefford Aldave ug Jayson Cabrilles. 

PUNTOS MATAG USA

USC (80) - Padillo 18,Cortes 15, Padayao 13, Hermosa 12, Gallarde 6, Cantonao 6, Bakker 6, Bautista 4, Joven 3

SWU (72) - Poligrates 16, Armecin 16, Litorja 15, Diango 11, Gallarde 9, Pacquiao 6, Jalandoni 2, Divinagracia 2    (BANATNEWS)