Wildcats nakabihag

CEBU, Philippines - Dakung bihag ang natangag sa sixth-ranked Cebu Institute of Technology (CIT) Wildcats kagabii human ilang gipakuratan ang no. 3 nga University of san Jose Recoletos (USJR) Jaguars sa overtime, 91-85 nga diriyot moresulta og away aron pabiling buhi sa quarterfinal round sa nagpadayong Cebu Schools Athletic Foundation, Inc. (CESAFI) didto sa Cebu Coliseum. Ang Wildcats maoy ikaduhang unseeded team nga mikulit og upset nga kadaogan human sab mikaging ang no. 1 qualifier University of Cebu (UC) Webmasters gikan sa mga kamot sa no.8 seed Don Bosco Technology Center (DBTC) Greywolves, 74-77 sa miaging semana.

Nabiyaan unta ang Wildcats og 12 puntos, 48-36 sa third period apan naka-apas kini sa hinayhinay hangtod nga misikit sila sa fourth period. Ang Wildcats maoy naglabaw human sa first period, 18-17 apan wala magdugay gibiyaan sab sila sa Jaguars kinsa may 37-32 nga abante sa halftime.

Ang rookie nga si Chester Curso maoy naghatod sa duwa ngadto sa overtime sa iskor, 79-all pinaagi sa usa ka maisugon nga drive may 1.7 segundo ang oras sa regulation. Ang iyang sagunson nga kuatro puntos sa overtime period may naghatag og 83-81 nga labaw sa Wildcats apan ang labing daku nga basket niadtong gabhiona mao ang three-point play sa beteranong point guard nga si Karen Rick dela Cerna kinsa nakakubit og foul sa three-point area gikan ni Abulaiz Suliman aron hatagan ang Wildcats og 88-85 nga abante.

Si Edwin Bibera maoy mitabla sa duwa sa kataposang higayon sa iskor, 85-all may 1:51 pa ang nahibilin sa regulation apan human niadto, kalit lang naka-angkon og sagunson nga sayop ang Jaguars hinungdan nga kalit silang nahugno.

Ang split charities ni Curso ug kataposang basket ni Marko Elmaga sa overtime period maoy nagtuboy ngadto sa kadaogan ug mao sab kadto’y ilang pinakadako nga labaw, 91-85 ug nagyagaw ang Jaguars kinsa nagkinahanglan og kalit nga siete puntos aron modaug.

Diriyot mahitabo ang away sa may 1:26 sa regulation dihang nabunal ang usa sa ilang sinaligan nga si Heroche Molero kinsa gibangilan sa mas dako nga si Kurt Amores sa Jaguars atubangan sa bench sa Wildcats ug misulod sa korte ang ubang players nga diriyot makahatag ug kasamok.

Si Molero mi-iskor og 22 puntos sa wala pa siya mobiya tungod sa gamay'ng piang sa tuong bukton ug walay seguro nga makaduwa ba siya sa playoff ugma.

Si Curso maoy nangu sa Wildcats pinaagi sa iyang 23 puntos, ang 12 niini pulos gikan sa fourth period lakip na sa overtime ug siya sab ang mi-iskor sa unang kuatro puntos sa Wildcats aron molabaw sila’g usab, 83-81.

Ang Jaguars gipangulohan nilang Bibera ug Jerome Villaver kinsa mihipos og 15 ug 14 puntos, matag usa kanila.

Puntos matag usa:

CIT (Srs.) 91—Curso 23, Molero 22, Dela Cerna 12, Elmaga 10, Reyes 9, Cañete 5, Sagmon 5, Ipang 4, Taboada 1

USJR (Srs.) 85— Bibera 15, Villaver 14, Amores 11, Suliman 10, Pateño 8, Lapiz 7, Senining 5, Duran 5, De la Peña 4, Dela Rama 3, Nudalo 2 Halftime: 32-37. - BANAT NEWS