Pink October Run karon na

CEBU, Philippines - Dul-an sa 600 runners ang gipaabot nga magginukdanay sayo ning buntag sa pagsikad sa Pink October Run diha sa Terraces sa Ayala Center Cebu.

Ang lumba gibahin ngadto sa upat ka kategoriya -- 10k (Doctors), 10 (Open), 5K (Open), 3K Fun Run ug 1K Fun Run.

Si Dr. Peter Mancao, ang tsirman sa Fun Run nagkanayon nga tumong sa maong lumba mao ang pagpahimangno sa mga kababayen-an kabahin sa breast cancer.

“We hope to increase awareness of the public with regards to the early diagnosis and treatment of breast cancer,” dugang pa ni Mancao.

Lakip sa mga dekalibreng runners nga gilaumang modagan mao sila si Mendel Lopez, Leizl Lumindas-Getaruelas, Madelyn Carter ug Elmer Bartolo. Modagan usab ang inilang running eye doctor nga si Dr. Yong Larrazabal uban ang iyang kapikas nga si Donna Cruz-Larrazabal.

Ang maong lumba gipasiugdahan sa Philippine College of Surgeons Cebu-Eastern Visayas Chapter, Ayala Center Cebu, I Can Serve Group, Rotary Club of Cebu Fuente, Sports and Fitness Enthusiasts (SAFE) ug Run for Sight Foundation.   (BANATNEWS)