Llanos mikulata ni Alcos

CEBU, Philippines - Walay hunong nga mipabuhagay sa nagpungasi niyang mga suntok si RP No.1 Nelson Llanos aron pagposte og unanimous decision nga kadaugan batok ni Julius Alcos sa main event sa "Friday Nights Live' niadtong Biyernes sa gabii didto sa Dalaguete Sports Complex.

Ang sangka nilang Llanos ug Alcos, unang gideklarar nga usa ka title bout alang sa RP light flyweight belt, apan tungod sa gamay'ng kasungian gihimo lang kini nga usa ka non-title fight.

Ang produkto sa IPI-Mandaue nga si Alcos gididakan og uno punto sa referee human sa iyang pag-headbutt ngadto ni Llanos nga miresulta sa pagkagisi sa agtang niini sa round 2. Apan si Llanos maoy mipatigbabaw sa maong away human ang tulo ka mga hurado mi-iskor og 95-94, 96-93 ug 97-92 pabor kaniya.

Sa supporting main event, ang flyweight prospect nga si Warlito Fareñas, mipahunong ni Roel Honor sa fifth round. Gigamit ni Fareñas ang iyang bentaha sa gitas-on aron mobuhi og mga hait nga jabs ug one-two combination nga mipatumba ni Honor sa round four.

Gitiwasan ni Fareñas sa misunod nga round si Honor ug gidabodabohan niya kini nga maoy nakapaaghat sa referee sa paghunong sa away sa nahabiling 45 segundos sa fifth round.

Gipakamang sab ni Weng Haya si Richie Binueza sa second round sa ilang sangka sa featherweight division.

Natay-og si Haya dihang naigo kini sa makabungog nga mga suntok ni Binueza sa unang round, apan sa misunod nga round, usa ka makabungog nga right hook ang nasugat kaniya hinungdan sa iyang pagkalup-og.

Si super bantamweight Ramil Soco milampos sa iyang away pinaagi sa third round KO batok ni Roldan Malinao, si Reil Mandate midaog sab pinaagi sa unanimous decision batok ni Jayme Bermiso.

Nisangpot sa usa ka technical draw ang away nila ni Jesus Mercado ug Jeffrey Pulvera.

 Si Alde de Zosa mipilde ni Arnel Adan sa ilang four rounder bout sa lightweight division ug si Juan Purisima miposte og daog pinaagi sa majority decision batok ni Jason Casimiro.    (BANATNEWS)