CEBU, Philippines - Bahaan na sa mga kumo ang dakbayan sa Talisay sa ipahigayong "Binukbukay sa Talisay" karong gabii diha sa Talisay City Sports Complex sa barangay Poblacion.
Moaway sa main event mao si Gideon Amba sa Wakee Salud Stable nga makigharong batok ni Greg Mangan sa IPI Stable.
Si Amba, kinsa nailhan isip knockout artist makigbinukbukay ni Mangan sulod sa 10 rounds ubos sa 110 lbs. division.
Sa supporting main event, si Richie Abapo sa Golden Dream Stable makigsangka usab ni John Paul Colon sa IPI Stable sa usa ka six-rounder bout.
Lima ka paresan ang magsangka sa 4-rounder nga naglakip nila ni Adelo de Sosa batok Ariel Adan sa Phil-Australia Stable, Favian Manzano sa Yanie Sta .Cruz Stable batok Edison Serrano, Memar Dula batok Romel Banguerigo sa Wakee Salud Stable, Sary Canonigo batok Jason Casimiro sa IPI Stable ug Delmar Cabatas batok ni Dionilo Salvador Jr.
Ang maong boxing event gipasiugdahan sa Talisay City Sports Commission (TCSC) uban sa suporta sa Talisay City Government ubos sa liderato ni Mayor Socrates Fernandez. (BANATNEWS)