2K runners moapil sa 1st Congressman Gullas Run

CEBU, Philippines - Mokapin sa 2,000 runners ang gipaabot nga mosalmot sa 1st Congressman Gullas Fun Run nga gikatakda karong Oktubre 11 nga manukad diha sa Talisay City Hall grounds.

Mao kini ang labing dakung lumba nga nahitabo sa siyudad, matud pa ni Talisay City Councilor Rodi Cabigas atol sa press conference kagahapon didto sa Social Hall sa Talisay City Hall.

Ang lumba usa sa mga highlights sa kasaulogan sa kapistahan sa ilang mahal nga patron Sta. Teresa de Avila karong Oktubre 15.

Ang lumba gibahin ngadto sa upat ka kategoriya – 1K (Senior Citizens), 3K (Inter-School, LGU ug Media), 5K (Open) ug 10K (Open).

Ganting salapi ug freebies ang madaog alang sa Youngest runner (Talisaynon ug non-Talisaynon), Oldest runner (Talisaynon ug non-Talisaynon), Best in Costume, Biggest delegation ug Pinaka Award gikan sa Rexona, usa sa mga sponsor sa maong Fun Run.

Ang registration fee nagkantidad og P150 libre na niini ang singlet, race number ug snacks, samtang ang mga tinun-an adunay registration fee nga   P50. Niadtong mga interesado, mahimong magpalista sa Cebu City Sports Center o dili ba sa Talisay City Sports Commission. 

Si race organizer Joel Baring, mitug-an nga mga dekalibreng runners ang gipaabot nga mosalmot sa lumba.

Mipadayag sa partisipasyon mao ang ABS-CBN News anchor Atty. Haide Acuña kinsa mao ang kampiyon sa miaging 1st Press Freedom Run niadtong Sabado.

Moparada usab og 300 ka mga delegado ang PNP-RTS ug PNP-RMG.

Sa laing bahin, gipahibalo ni 1st District Congressman Eduardo R. Gullas nga adunay pagahimuon nga cycling ug mountain bike competition karong Domingo sa alas-6:00 sa buntag diha sa Cebu South Coastal Road.   (BANATNEWS)